Tak walkila’, ts’o’ok u ya’abtal 72 por siientoil le jaytúul máax ti’ tsaayal u k’oja’anil birueeláa del monóo ti’ le ts’ook p’iisk’iina’, tumen ts’o’ok u yantal -tak le lunes máanika’- 252 u túul máax ti’ jeets’el yaan, beey k’a’ayta’ab tumen Secretaría de Salud Federal.
U péetlu’umil Yucatáne’, ti’ yaan tu yóox kúuchil, ichil tuláakal México, ka’alikil Quintana Rooe’, kéet yanik yéetel uláak’ péetlu’umo’ob.
U mola’ayil toj óolale’ tu ya’alj tak le 15 ti’ agosto máaniko’, ts’o’okili’ u yojéelta’ab yaan 610 u túul máax ku tukulta’al yaan ti’ le k’oja’anila’, ti’ le je’elo’obo’, 131 táan u xak’alta’al ti’al u yila’al wa leti’, yéetel jets’a’abe’ ma’ leti’ ts’aayal ti’ 227 u túulali’.
También te puede interesar: Yucatán, tercer lugar nacional en casos de viruela del mono
Beey túuno’, tak te’e k’iino’oba’ ts’o’ok u yila’al yaan wa máax ti’ tsaayal le k’oja’ana’ ti’ 20 u p’éel u péetlu’umilo’ob México. Ti’ le beyka’ajo’, u 94 por siientoil k’oja’anchaja’anobe’ xiib, yéetel u 45.6 ti’ le je’elo’obo’, yaan u ja’abil ichil 20 tak 39.
Tu yóox kúuchil yaan Yucatán
Tak ka’aj xot’a’ab xookil le 15 ti’ agosto máaniko’, ila’abe’ Ciudad de Méxicoe’ leti’e’ tu’ux asab ya’ab yaan máaxo’ob tsaayal ti’ob le k’oja’anila’, tumen jeets’el yaan ti’ 141 u túulali’. Tu paache’ ti’ yaan Jalisco, tu’ux xoka’an 46; Yucatán, tu’ux a’alan yaan 15 (ba’ale’ tak walkila’ u mola’ayil SSY u jets’amaj yaan 18i’); Quintana Roo, Estado de México, Baja California, Chiapas yéetel Veracruze’ jets’a’an yaan bolontúul máak k’oja’an yéetel birueeláa del monóoi’.
Beey túuno’, tu péetlu’umil Tabasco, Puebla yéetel Colimae’ jeets’el yaan ka’atúul máax ti’ tsaayal le k’oja’anila’. Beyxan tu péetlu’umil Baja California Sur, Michoacán, Querétaro, San Luis Potosí, Sinaloa, Chihuahua yéetel Morelos yaan a jujuntúulo’obi’.
Xak'alutskíinsa'an tumen: Sasil Sánchez Chan
