U noj kaajil Chetumal yéetel u méek’tankaajilo’obe’ ts’o’ok u ya’aliko’obe’ yaan tu’ux búulo’ob le jueves máanika’, úuchik u seen k’áaxal cháak te’e ts’ook k’iina’, tumne beey k’a’aytabik kun úuchul yóok’lal u oonda tróopikalil 23. Ti’ reedes soosyalese’ kajnáalo’obe’ táan u ya’aliko’obe’ leti’e’ asab k’a’amkach cháakil k’áax ti’ le k’iino’oba’, le beetike’, tak Ejército yanchaj u meyajtik plan DN-III-E.
Ichil ba’ax jts’a’ab ojéeltbil tumen u áayuntamientoil Othón P. Blanco, u jo’olpóopilo’ob Protección Civil ti’ le péetlu’umilo’ beyxan ti’ le méek’tankaajo’, walkila’ táan u beeta’al xaak’alo’ob yéetel táan u yáantajo’ob ti’al u ts’aatáanta’al ba’ax ts’o’ok u yúuchul tumen le cháako’, ikil táan u yantal múul meyaj ichil Sedena, Semar yéetel Policía Quintana Roo.
También te puede interesar: Lluvias inundan calles de Chetumal y poblaciones rurales de OPB
“Ichil junsúutuk kéen k’a’ayta’ak jejeláas ba’alo’ob yóok’lal u tuukulil yaan ti’al u je’ebel kúuchilo’ob ti’al u k’a’amal u kajnáalilo’ob Chetumal. Much xak’alte’ex mantats’ ba’ax le ku ts’a’abal k’ajóoltbil tumen mola’ayob”, xoka’ab ti’ ts’íib k’a’ayta’ab tumen áayuntamiento.
Yaan kajnáalo’obe’ ts’o’ok u na’aksiko’ob oochelo’ob ti’ reedes sosyales, ti’al u ye’esiko’ob bix p’aatal le tu’ux kaja’ano’obo’, ts’o’okole’ ku yila’ale’ yaan tak kiis buuts’o’ob búulo’ob. Le beetike’ táan u k’áatiko’ob ka séeb beeta’ak wa ba’ax tumen u yóox jaatsilo’ob meyaj jala’ach.
Beey túuno’, u jala’achil u péetlu’umil Quintana Rooe’ tu k’a’ayajte’, tumen táan u seen k’áaxal cháake’, ts’o’ok u jach búulul u múuch’kajtalilo’ob Chetumal, ichil le je’elo’obo’ ti’ yaan López Mateos yéetel Fidel Velázquez, beyxan Caribe, Sian Ka’an yéetel Arboledas.
Uláak’ ba’ale’, táan u k’áata’al ti’ kaaje’, tumen jach buulule’ ma’ u yantal u máano’ob tu baantail: Insurgentes ku núupul yéetel Chetumal, Juárez yéetel Insurgentes, Chablé yéetel Polyuc, Morelos yéetel Primo de Verdad, Maxuxac yéetel Nicolás Bravo, San Salvador yéetel Morelos beyxan Constituyentes yéetel Erick Paolo.
U mola’ayil Secretaría de la Defensa Nacional, ikil táan u meyaj Comandancia de la 34 Zona Militar yéetel Séptimo Regimiento de Caballería Motorizado, tu ts’áaj k’ajóoltbile’ yóok’lal le seen ja’ ts’o’ok u báalao’, káaj u meyajta’al Plan DN-III-E, tumen Ejército Mexicano.
Tak walkila’ a’alane’, tu lu’umil Quintana Roo yéetel tu petenil Yucatáne’ yaan u jach k’áaxal cháak tu ya’abil tu’ux, tumen beey jts’a’ab k’ajóoltbil tumen Centro Nacional de Huracanes de Miami, Florida.
Xak'alutskíinsa'an tumen: Sasil Sánchez Chan
