U yoochel jejeláas ba’alob yéetel u jeelo’ob jach k’ajóoltano’obe’ líik’ u biinbalo’ob ka’an úuchik u chúunsa’al Segundo Festival del Globo Maya, tu méek’tankaajil Tahmek. Te’elo’ táakpaj meyaj k’abo’ob ti’ u noj lu’umil México yéetel Colombia. Cha’ane’ jump’éel meyaj táakmuk’ta’ab tumen u jala’achil Yucatán, Mauricio Vila Dosal, ikil u kaxta’al uláak’ túumben ba’alob ti’al u béeytal u xíimbalta’al le lu’uma’, tu’ux ka yanak xan meyaj ti’ kaaj yéetel ka béeyak u yokol taak’in te’e lu’uma’.
Máax jo’olbesik Secretaría de la Cultura y las Artes (Sedeculta), Loreto Villanueva Trujillo, k’uch tu súutukil úuchik u chúunsa’al, tu jeel jala’ach Vila Dosal, tu’ux beeta’ab jejeláas e’esaijlo’ob, yanchaj janabe’enba’alo’ob yéetel uláak’ its’atil meyajo’ob tu k’iinil sábado yéetel domingo máanika’.
Te’el súutuko’, Villanueva Trujillo tu ya’alaje’ meyaje’ táan u múul beeta’al ichil Sedeculta, Secretaria de Fomento Turístico (Sefotur) yéetel Protección Civil de Yucatán (Procivy), beyxan u áayuntamientoil le kaajo’.
Beyxan tu ya’alaje’ yéetel meyajo’ob je’el bix le je’ela’ táan u kaxta’al u mu’uk’ankúunsa’al ba’ax ku beeta’al ti’al u yokol taak’in te’el lu’uma’, ti’al u yutsil kaaj meyajtik gloobos yéetel u jeel k’abil meyajo’ob, je’el bix xan le ku beeta’al yéetel u nu’ukbesajil Ejecutivo Yucatán Expone yéetel le ku kaxta’al u péektsilta’al u ba’alumbáaj kaaj ti’ uláak’ táanxel péetlu’umo’ob.
También te puede interesar: Colorido y variado en temática, el Segundo Festival del Globo Maya de Tahmek
Te’el súutuko’, táakpaj xan u jo’olpóopil Tahmek, Neyda María Heredia Leal, máax tu ya’alaje’ “u tuukulil cha’ane’ leti’ u chíikbesa’al u kaajil ti’al u k’ajóolta’al beey kaaj tu’ux ku beeta’al gloobóos, tumen je’el bix le uláak’ máako’ob yano’ob te’el kóorredoro’, je’el u konik u meyajo’obe’.
Táakpaj u múuch’ilo’ob Itlan de Hüi, Turma Chincocuac taalja’ano’ob Estado de México; Globos Don Nabor ti’ u lu’umil Morelos; Turma Tlaloc yéetel Tlayoli ti’ Ciudad de México; Titanes yéetel Rock World ti’ u péetlu’umil Veracruz; Cantóyuz, Globos Tlatoany, Arte y Tradición, Grupo Araquen, je’el bix xan Truma Arte y Vida ti’ u péetlu’umil Michoacán; yéetel noj páayt’anta’ab u múuch’il Tradición prohibida, ti’ u kaajil Medellín, Colombia.
Ichil yukatekoil táakpajo’obe’ ti’ yanchaj Daniel Art, Globos JC yéetel Turma Maya ti’ u méek’tankaajil Tixkokob; T Globo, ti’ u noj kaajil Jo’, yéetel Globos Nueva Era, Artesanos de Tahmek beyxan Taller de Globos ti’ Casa de la Cultura ti’ le méek’tankajo’.
Xak'alutskíinsa'an tumen: Sasil Sánchez Chan
