“Nunkiní, Najil Xook Maayat’aan”, jump’éel meyaj táan u taal u beeta’al tumen jkaanpechil, Adolfo Haas Naal, yéetel yaan u táakbesa’al ichil “Plan de Acción Mundial para el Decenio Internacional de las Lenguas Indígenas 2022-2032” jets’a’ab u beeta’al tumen Organización de las Naciones Unidas para la Educación, la Ciencia y la Cultura (UNESCO) tu ja’abil 2021.
Jayp’éel k’iino’ob paachile’, máaxo’ob táaka’ano’ob ichil Nunkiní, la Escuela Virtual para la enseñanza de la Lengua Maya, t’ana’abob tumen UNESCO México ti’ Internet, ti’al u ts’áako’ob k’ajóoltbil meyaj ku beetik, “Fortalecimiento de la lengua maya como Patrimonio Cultural”, tu súutuk úuchik u beeta’al tsikbale’ táakpaj máax chíikbesik UNESCO tu lu’umil México, Frédéric Vacheron.
También te puede interesar: Proyecto de lengua maya campechano participará en iniciativa de la ONU
“Jach táaj k’i’imak k-óol u béeytal u táakpajal le meyajila’ ichil Plan de Acción Mundial para el Decenio Internacional de las Lenguas Indígenas 2022-2032, ts’o’okole’ tumen táan xan u táakmuk’ta’al tumen jump’éel noj mola’ay je’el bix UNESCO, yaan kjach ts’áak k-óol ti’al u béeytal noj ba’alob yéetel le lajun ja’abo’ob jets’a’an ti’al u meyaj máak yóok’lal máaewal t’aano’ob”, tu tsikbaltaj Adolfo Haas, máax jo’olbesik meyaj ku beeta’al ti’al u ka’ansa’al maayat’aan.
Beyxan, tu ch’a’achibtaje’ jump’éel ti’ u nooyil Decenio Internacionale’ leti’ u péektsilta’al ka’ansaj yéetel kaambal, tu’ux ka kéet yanak ba’al, ka táakbesa’ak tuláakal máak, yéetel ka no’oja’an beeta’ak, ich máasewal t’aano’ob, tu’ux ku yúuchul kaambal, beyxan tu’ux ma’.
“Ko’one’ex mentik u k’a’am yupajal le maayat’aan ti’ tuláakal yóok’ol kaab”, “Hagamos que la lengua maya retumbe en el mundo”, tu ts’ook a’alaj.
Xak'alutskíinsa'an tumen: Sasil Sánchez Chan
