Ichil ba’ax ku tsikbaltik Arsenio Rosado, máax jo’olbesik Instituto de Salud Mental de Yucatán, u 80 por siientoil wíinik tu kíinsajubáaje’, tu kaxtaj u yáantajil juntúul sikologóo, jump’éel ja’ab ma’ili’ u luk’s u kuxtale’ ba’ale’ ma’ j-ila’ab wa yaan u yóol u beetej. Beey tu tsikbaltaj ichil u meyajil Compartiendo Esperanza, tu’ux kaxta’ab u ts’a’abal k’ajóoltbil jejeláas mola’ayob táan u meyajtiko’ob ba’al yaan u yil yéetel u kíinsikubáaj máak te’e péetlu’uma’.
Ichil u tsikbalil Servicios de atención al riesgo suicida de organizaciones civiles y gubernamentales, jts’a’ab k’ajóoltbil pribaadóo mola’ayob beetik le meyaja’, je’el bix Salvemos una Vida, Ancla de Esperanza, yéetel Fundación Sak; beyxan u mola’ayilo’ob jala’ach je’el bix u áayuntamientoil Jo’, yéetel Instituto de Salud Mental.
También te puede interesar: 80 por ciento de las personas que cometieron suicidio, antes buscaron ayuda profesional: Rosado
José Luis Vales, máax ku meyaj ich Salvemos una Vida tu k’a’ajsaje’ leti’obe’ ku meyajo’ob ti’al u yáantiko’ob máaxo’ob jach yajil luuba’an u yóolo’ob, beyxan le máaxo’ob ku tukultik u luk’sik u kuxtal. Le 10 ti’ junio ku taalo’ yaan u chukik 27 ja’abo’ob káajak u ts’aatáanta’al óoxp’éel noj ba’albo’ob: u kaláanta’al ma’ u yúuchul, u ts’a’abal sikoloojiikóo áantaj yéetel u k’amiko’ob t’aan ti’ telefono bul k’iin yéetel bul áak’ab.
Mola’aye’ yanchaj tumen ila’ab jach ya’abach máak ku luk’sik u kuxtal tu lu’umil Yucatán: “jach táaj ku beetik u chi’ichnaktal máak”. Wa taak u t’aan máake’ ku yutstal u beetik te’ela’: 9999453777 yéetel 9999245991.
Beey túuno’, Arsenio Rosado, máax jo’olbesik Instituto de Salud Mental de Yucatán, tu ki’iki’ óoltaj ba’ax ku taal u beeta’al tumen Asociación de Suicidología; ts’o’okole’ tu k’áataj ti’ kúuchilo’ob k’a’aytik péektislo’obe’ ka’ ch’éenek u k’a’ayta’al ba’al ma’ sáasil mix patali’.
Tsikbalta’abe’, pak’be’en k’oja’ane’ tu beetaj u yantal uláak’ ya’abach máak lúub u yóol yéetel jach chi’ichnakchaji, le beetik yanchaj xan ya’abach máak tu kíinsajubáaj. Ti’al u t’aan máak tu mola’ayil Instituto de Salud Mental ku yutstal u beetik te’ela’: 8001088000, ti’al u k’amik áantaj.
Yaan uláak’ mola’ayob meyajtik yéetel ts’áak sikoloojikóo áantaj, je’el bix Fundación Sak yéetel u áayuntamientoil Jo’.
Xak'alutskíinsa'an tumen: Sasil Sánchez Chan
