Tumen ojéela’an beyka’aj u k’a’ananil meyaj ku beeta’al tumen xk’am paal tu maaya lu’umil Tulume’, u mola’ayil Dirección de Salud Municipal yaan u túumbenkuunsik meyaj u beetmaj tu’xu xoka’an jaytúul yani’, yéetel yaan xan u ts’a’abal kaambal xook ti’ máaxo’ob láayli’ beetik le úuchben meyaja’.
Sonia Vargas Torres, máax jo’olbesik Salud te’e méek’tankaajo’, tu ya’alaje’ u ts’ook ba’ax ojéelta’abe’, yaan kantúul ko’olel beetik u xk’am paalil te’e noj kaajo’ yéetel tu méek’tankaajilo’ob Tulum.
Xmeyaje’ tu tsikbaltaje’ máaxo’ob táaka’ano’ob ichil u meyajil ts’ak yaje’, mantats’ u tsikbalo’ob yéetel xk’am paalo’ob, ts’o’okole’ mix ba’al a’alik wa ma’ táan u béeytal u beeta’al le meyaja’.
También te puede interesar: Harán censo de parteras en Tulum
Ba’ale’, jach najmal u yojéelta’al tumen xk’am paalo’ob kéen yanak je’el ba’axak sajbe’entsil ti’ ko’olel yo’omchaja’an wa ti’ u chan paalil, tumen wa beyo’ jach k’a’abéet u túuxta’al tu kúuchil ts’ak yaj; walkila’ yaan Unidad Médica tu kaajil Cobá yéetel Hospital Comunitario tu kaajil Chanchen Primero.
Vargas Torrese’ tu ya’alaj u mola’ayilo’ob jala’ache’ láayli’ u chíimpoltiko’ob ba’ax suuka’an u beeta’al te’e kaajo’obo’, ba’ale’ k’a’anan u yúuchul kaambal yéetel u ts’a’abal nu’ukulo’ob k’a’abéet ti’al u ts’aatáanta’al ko’olel.
“Ku béeytal u beeta’al jejeláas kaambal xooko’ob, to’one’ táan ktukultik u ka’a yantal múul meyaj yéetelo’ob tumen láayli’ u yantal ya’abach ko’olel ku bin yiknal xk’am paalo’ob kéen yo’omchajak. U k’a’ananile’ leti’ u yojéelta’al tumen máaxo’ob beetik le noj meyaja’, ba’ax seen sajbe’entsil je’el u yantale’, yéetel bix je’el u beetik uts u k’a’abéetkunsa’al túumben nu’ukulo’ob kéen meyajnako’ob, je’el bix ti’al u p’i’isil u péek u puksi’ik’al máak, ti’al beyo’ u túuxta’al ko’olel tu kúuchil ts’ak yaj kéen k’a’abéetchajako’”, tu tsolaj.
Xak'alutskíinsa'an tumen: Sasil Sánchez Chan
