Tumen ya’ab u k’a’abéetkunsa’al yéetel ti’al u asab ma’alobchajal u yu’uba’al u t’aan kaaje’, u nu’ukbesajil Línea Mujer ku taal u beeta’al tumen Instituto Municipal de la Mujer (IMM) ila’ab u mu’uk’ankúunsa’al ba’ax ku beeta’ali’, tumen ku k’a’amal tak jo’op’éel t’aano’ob ichil jump’éelili’ súutuk, beey jts’a’ab k’ajóotlbil tumen Fabiola García Magaña, máax jo’olbesik le mola’ayo’.
Tu tsikbaltaj ka’ache’, ma’ tu yokol mix le t’aano’ tumen yaan máax ku ts’aatáanta’al; óoli’ chéen ti’ ka’atúul máak ku yutstal u núuka’al ti’ jump’éelili’ súutuk.
U ti’al u yutsil meyaje’ k’a’abéetkunsa’ab u asab ma’alob téeknolojia ti’al u k’a’amal tak jo’op’éel t’aan ti’ jump’éelili’ súutuk, ti’al u ts’aatáanta’al áantaj ku k’áatik ko’olel kéen loobilta’ak, kéen jach táaj chi’ichnachajak yéetel kéen u k’a’abéetkuns u tsolxikinta’al.
Lee: Ante demanda de servicios, Línea Mujer ya atiende cinco llamadas a la vez
Uláak’ ba’ax tu tsikbaltaje’, ya’abkunsa’ab meyajo’ob ku ts’a’abal ti’al u yáanta’al ko’olel ku ya’alik taak u kíinsikubáaj; u ya’abile’ yanchaj tu k’iinil táan pak’be’en k’oja’an Covid-19.
Ti’al u táakmuk’ta’al ko’olele’, ku ts’a’abal ojéeltbil yaan u yáantajil ku ts’a’abal tumen Centro de Capacitación para el Trabajo Industrial, tumen ku beeta’al kaambal xooko’ob yéetel ka’ansajilo’ob.
Ku yantal jejeláas tsikbalo’ob yéetel meyajo’ob ti’al ko’olel ku meyaj ich najo’ob, ku múul beeta’al yéetel Jade Sociales, ti’al u yojéeltiko’ob máakalmáak u páajtalilo’ob yéetel ba’ax unaj u beeta’al ti’al u chíimpolta’al.
García Magaña tu ya’alaje’, sáansamale’ ku yokol ichil ukp’éel yéetel lajunp’éel t’aano’ob ti’al u k’áata’al áantaj, tu ts’ook le winalo’ ku yantal kex 50 t’aano’ob.
Xak'alutskíinsa'an tumen: Sasil Sánchez Chan
