Úuchik u yantal máax a’alik ma’ ki’imak u yóol ba’ax ku tala u beeta’al tumen xjueesa Elsy del Carmen Villanueva Segura, tumen ma’ táan u chíimpoltik u yóol ko’olel úuchik u ka’a jets’ik bix kun na’atbil loobilaj beeta’ab ti’ juntúul k’olel, kex tumen tak pool beeta’abe’ ku k’áatik ka ch’a’anuktak beey ko’olel le óota’ab kíinsbilo’, le beetike’, Mario Alberto Castro Alcocer, máax jo’olbesik Tribunal Superior de Justicia (TSJ) ti’ u péetlu’umil Yucatán, tu ya’alaje’ yaan u ts’a’abal u si’ipil le xjueesa wa ku yila’al yaan ba’ax ma’ paatal tu beetaji’.
“Tak pool tu beetaj ko’olel (máax loobilta’ano’) tu táan le Judicaturao’ tu ts’áaj tumen ku ya’alike’ yaan u kuuch máax táan u beetik le p’iis óolalo’, yéetel ti’ Consejo de la Judicatura yaan u páajtalil u xak’altik ti’al u jets’ik wa yaan u si’ipil, ti’al u ts’a’abal u kuuch”, tu tsikbaltaj máax jo’olbesik xan Consejo de la Judicatura.
También te puede interesar: TSJ de Yucatán analiza posible sanción a juez Elsy Villanueva por queja de víctima
Castro Alcocere’ tu ya’alaje’ Poder Judicial del Estado ma’ táan u éejentik mix jump’íit je’el ba’axak loobilajil yóok’ol ko’olel, ts’o’okole’ yaan bin u jach ts’aatáantik ba’ax kun jets’ibil yóok’lal k’áatan táan u beeta’al ti’al u ch’a’anukta’al ba’ax beeta’ab ti’ le ko’olelo’, ti’al ka pakta’ak beey óotab kíinsbil le ko’olelo’.
Taka’ab u pool xjueesa Elsy del Carmen Villanueva Segura tumen ma’ táan u ch’a’anuktik u yóol ko’olel kéen u xak’alt loobilaj beeta’an, tumen yanchaj juntúul xiib tu jich’aj ka’atéen le xch’úupal yéetel le táan u biinsikubáaj ka’achij.
Villanueva Segurae’ ma’ tu ch’a’anuktaj xan ba’ax yáax ucha’an yéetel loobilaj tu baatsil le ka’atúul máako’ob ka’alikil táan u biinsikubáajo’ob ka’achij, mix xan táan u ch’a’anukta’al loobilaje’ úuch tumen leti’e’ xch’úupal ma’ tu yóotaj u ka’a biinsikubáaj yéetel le máako’.
Le beetike’, Castro Alcocere’ tu k’a’ajsaje’ máaxo’ob ku p’iis óolalo’obe’ k’ubéenta’ab ti’ob u noj meyajil u ch’a’anuktiko’ob u yóol ko’olel wa xiib ti’ ba’ax ku xak’altiko’ob. Ts’o’okole’ le jueeso’obo’ jeets’elo’ob meyaj kamp’éel ja’ab; kéen ts’o’okok le beyka’ajo’ ku beeta’al xaak’alo’ob ti’al u yila’al wa unaj u p’a’atalo’ob wa u tse’elelo’obi’.
Xak'alutskíinsa'an tumen: Sasil Sánchez Chan
