U múuch’kabil Cosmos "La fortaleza de la unión", táan u múul meyaj yéetel uláak’ múuch’kabilo’ob ti’al u beeta’al múuch’ob ts’aatáantik u toj óolal u tuukul u kajnáalilo’ob lajunp’éel u méek’tankaajilo’ob tu xamanil u kaajil Jo’, ti’al u kaxta’al u xu’ulsa’al yajil lúub óol, u tuukul u kíinsikubáaj máak yéetel uláak’ k’oja’anil ku tsa’ayal tu tuukul paalal yéetel táankelemo’ob.
Uláak’ ba’al táan u taal u beeta’al tumen múuch’kabilo’obe’, leti’e’ kaambal xooko’ob xma’ bo’olil yaan ba’al u yil yéetel u kaxtik máak ba’al u meyajtej, u kana’al u beeta’al jejeláas janabe’enba’alob, móodelajée, meyaj che’, cha’an yéetel ch’a’a oochel, maarketing díijital, u kaláantikubáaj máak tu juunal, ichil uláak’ ba’alob, ts’o’okole’ yaan u beeta’al u kúuchil u beeta’al éejersisyo xma’ bo’olil, ichil u jeel meyajo’ob kun meyajtbil ti’ u 47il méek’tankaajilo’ob Jo’.
También te puede interesar: Cosmos crea grupos de salud mental en comisarías de Mérida
Víctor Morales, máax patjo’olt Cosmose’, tu tsolaj múuch’kabile’ meyajnaja’an ti’ le méek’tankaajo’obo’, beyxan ti’ 96 u p’éel u kaajilo’ob Yuatán, tu’ux u yilmajo’obe’, jump’éel ti’ le noj talamilo’ob ku máansik kaajnáalo’ob walkila’, leti’e’ yaan ba’al u yil yéetel u toj óol u tuukulo’ob, ichil uláak’ ba’alob.
Tak ma’ seen úuche’, tu ya’alaj, tu yilajo’obe’ yanchaj ka’atúul paal, ichil bolonp’éel yéetel bulukp’éel u ja’abil, tu noojolil Jo’, tu yóotaj u kíinsikubáaj.
Beyxan, u péetlu’umil Yucatáne’, ti’ yaan ichil le yáax lu’umo’ob tu’ux asab ya’ab u kíinsikubáaj máak yéetel tu’ux asab ya’ab máak yajil luba’an u yóol. Le beetike’, tu yóotaj u beetiko’ob le meuaja’, tu’ux beeta’ab le múuch’ilo’ob áantaja’, tu’ux táaka’an u táankelemilo’ob le kaajo’obo’, ti’al u ka’ansa’al ti’ob bix je’el u yutstal u yáantiko’ob máaxo’ob táan u máansiko’ob le talamila’.
Yéetel u nu’ukbesajil Una mano amiga, ku beeta’al tiskbalo’ob, beyxan ku k’u’ubul u ju’unil máaxo’ob je’el u páajtal u yáantajo’ob ti’ ba’ax yaan u yil yéetel u toj óol tuukul wíinik. Ti’al u páajtal u yojéelta’al uláak’ ba’alob yóok’lal le meyaja’, ku páajtal u xak’alta’al u kúuchil @COSMOSorganizacion.
Xak'alutskíinsa'an tumen: Sasil Sánchez Chan
