Kex ma’ béeychaj u jach jets’ik jaytúuli’, máax jo’olbesik Tribunal Superior de Justicia del Estado de Campeche (TSJE), Virginia Leticia Lizama Centurión, tu jets’aje’ u ya’abil tak pool ku k’a’amal te’elo’, ku beeta’al ti’al u ts’aatáanta’al loobilaj ku beeta’al ti’ ko’olel ichil u baatsil, je’el bix xan yóok’lal máaxo’ob ma’ táan u ts’áako’ob u tojol u tséenta’al u paalal.
Lizama Centurióne’ tu ya’alaje’, jach táaj ts’o’ok u ya’abtal ko’olel ku loobilta’al tu yotoch, tumen beey u chíikpajal tu kúuchilo’ob Centros de Justicia para la Mujer tu méek’tankaajilo’ob Carmen, Escárcega yéetel Kaanpech; beyxan tu mola’ayil Secretaría de Protección y Seguridad Ciudadana (SPSC), je’el bix xan yóok’lal t’aan ku k’a’amal sáansamal 911.
También te puede interesar: Violencia familiar y deudores alimenticios, mayores diligencias del TSJE Campeche
Ma’ tu ya’alaj buka’aji’, ba’ale’ tu tsikbaltaje’, le je’elo’ jump’éel nojoch talamil, le beetik u ya’abil máaxo’ob ku bino’ob tak pool te’e Tribunalo’ ku beeta’al tumen ku loobilta’al máak ichil u baatsil, yéetel yóok’lal u bo’olil u tséental paalal, ba’ale’ kex ma’ táan u páajtal u tsoliko’ob ba’axten ma’ táan u beetiko’ob ba’ax najmal yóok’lal u paalale’, unaj u jach kanik u kaxtiko’ob ba’al kéen u ya’alo’ob ti’al ma’ u yantal uláak’ noj talamo’ob. Ba’ale’ ya’abach juntéenake’ ku yúuchul tumen yanchaj ya’abach máak p’áat mina’an meyaj ti’, le beetik ku xantalo’ob, “yaane’ ts’o’ok u ch’a’ajoltik u meyajo’ob, ba’ale’ yaane’ láayli’ u kaxtiko’obi’”, tu tsikbaltaj.
Ba’ale’, kex beyo’, láayli’ u t’u’ulpachtiko’ob máaxo’ob taka’an u pool ti’al u yila’al u beeta’al ba’al je’ex unaje’, tumen paalale’, k’a’anan u tséenta’al, u ma’anal u nook’ yéetel ba’ax k’a’abéet ti’ ti’al u líik’il tu beel.
Xak'alutskíinsa'an tumen: Sasil Sánchez Chan
