Tu péetlu’umil Yucatáne’ ts’o’ok u yantal 37 u túul máax xoka’an tsaayal ti’ deengue; beey ila’ab tak le 3 ti’ septiembre máaniko’, ichil u tsoolts’íibil Boletín Epidemiológico, beeta’an tumen Secretaría de Salud ti’ u noj lu’umil México; láayli’ te’e k’iino’obo’, ba’ale’ ti’ u ja’abil 2021e’ chéen juntúul máax tsaayal ti’ dengue yéetel “talamchaja’an” ti’.
Ichil ba’ax ojéela’ane’, u ya’abil máax ti’ yaan le k’oja’naila’ “ma’ jach talamili’”, tumen beey yanik 24 u túulal, uláak’ 12 “táan u yila’al óol sajbe’entsil”, yéetel chéen juntúul ko’olel “talam” yanik yéetel.
También te puede interesar: Yucatán acumula 37 casos de dengue este 2022
Tak walkila’, te’e noj lu’uma’ ma’ chíikpajak wa yaan chikungunya mix zikai’.
Tu winalil julioe’, u áayuntamientoil u noj kaajil Jo’, káaj u beetik fúumigasyon yéetel u kaláantik ma’ u yantal tu’ux u tóop’ol k’oxol te’e najo’obo’, ti’al beyo’ u yila’am ma’ u k’i’itpajal k’oja’anilo’ob ku tsa’ayal yóok’lal u k’oxolil Aedes Aegypti.
Jo’olpóope’ tu ts’áaj k’ajóoltbile’ ichil wakp’éel winalo’obe’ yaan u beeta’al le fúumigasyono’.
Tak walkila’, ts’o’ok u fúumigarta’al 2 mil 093 kms, yéetel ts’o’ok ka’apúul u bino’ob te’e méek’tankaajo’obo’.
Ti’ óoxp’éel ja’abe’, ts’o’ok u fúumigarta’al 53 mil 453 kms ichil u noj kaajil Jo’, yéetel k’ucha’ano’ob tak te’e méek’tankaajo’obo’, kex uktéen.
Xak'alutskíinsa'an tumen: Sasil Sánchez Chan
