Yéetel u yáantajil jo’op’éel noj jaatso’ob, tu’ux táaka’an xan jump’éel áaplikaasyo’one’, táan u kaxta’al u ts’aatáanta’al u toj óol tuukul u kajnáalilo’ob Yucatán. Nu’ukbesaj tukulta’ab u beeta’ale’, k’a’aytab le lunes máanika’; jts’a’ab u k’aaba’ beey Juntas y Juntos por la Salud Mental de Yucatán.
Tu kúuchil Centro de Convenciones Siglo XXI, Mauricio Sauri Vivas, máax jo’olbesik Secretaría de Salud de Yucatán (SSY) tu k’a’ajsaje’ Organización Mundial de la Salud (OMS) ts’o’ok u ya’alike’, wa ma’ toj u yóol u tuukul wíinike’, mina’an toj óolal, le beetik k’a’anan u kaláanta’al ti’al u tojbe’en xíimbal wíinik tu kuxtal.
“Sáasil yanik u pak’be’en k’oja’anil Covid-19e’ tu beetaj u ya’abtal máax ku yajil lúubul u yóol, ku chi’ichnaktal, ku yaj óol, ku yóotik u kíinsikubáaj yéetel ku kíinsikubáaj. Le beetike’ k’a’anan u yantal múul meyaj ti’al u kaláanta’al u toj óol tuukul máak”, tu ya’alaj.
También te puede interesar: Presentan aplicación y estrategia para monitorear la salud mental en Yucatán
Beey túuno’, tu tsikbaltaje’, ichil ba’ax jets’a’an tumen OMSe’, ichil tuláakal yóok’ol kaabe’ maanal 800 mil u túul máak ku kíinsikubáaj, le beetike’ leti’e’ ka’ap’éel ba’ax kíinsik máak yaan u ja’abil 15 yéetel 29.
“Ichil ba’ax chíikbesa’an tumen Inegie’ tu ja’abil 2021e’, yanchaj 8 mil 400 u túul máak tu kíinsubáaj tu noj lu’umil México. Kex u 70 por siientoile’ yanchaj ba’al u yil yéetel uláak’ jump’éel k’oja’anil”, tu tsikbaltaj.
Nu’ukbesaj ku beeta’al walkila’ ku táakbesik jo’ojaats meyaj: u yantal múuch’ilo’ob máak meyaj ti’ kaajo’ob; u beeta’al xaak’al yóok’ol tuláakal kajnáalo’ob tu’ux ka k’a’abéetkunsa’ak téeknolojia; u k’a’abéetkunsa’al Código 100 ichil tuláakal u mola’ayilo’ob toj óolal yéetel u ye’esa’al ti’ tuláakal ajmeyajo’ob ba’ax najmal u beeta’al yóok’lal le je’ela’.
Ti’al túun u beeta’al meyajo’obe’, yaan u beeta’al múuch’ilo’ob meyaj; walkila’ ts’o’ok u yantal ukp’éel tu’ux ku meyaj 116 u túul máak, máaxo’ob ts’o’ok u ts’aatáantiko’ob 4 mil 337 u túul máako’ob.
Uláak’ noj ba’ale’ leti’e’ táamisajée kun beetbil yéetel u yáantajil u nu’ukbesajil MeMind, tumen yéetele’ yaan u yila’al máax ti’ ts’o’ok u káajal u yantal u tuukulil u kíinsikubáaj, tumen yéetel k’áatchi’ob kun beetbile’ yaan u yila’al tak beyka’aj oka’an tu tuukul máak u tselik u kuxtal, ti’al u béeytal u yáanta’al je’el bix unaje’ ti’al ma’ u beetik.
Xak'alutskíinsa'an tumen: Sasil Sánchez Chan
