Tu lak’inil u péetlu’umil Yucatán, tu méek’tankaajil Chankome’, ti’ yaan Aracely yéetel Gabriela, ka’atúul xlo’obayen ko’olel ku máan u tsikbalto’ob ich maaya t’aan, le jejeláas ba’al u yojelo’ob yóok’al u kuxtalil yóok’ol kaab yaan te’e tu baantailo’obo’. Le je’elo’ ku beetiko’ob tu táan paalal yéetel nojoch máako’ob.
18 u ja’abil Gabriela del Rosario Kuyoc Kuyoc; Lourdes Aracely Kuyoc Dzul 20 yaan ti’. Tu ka’atúulalo’obe’ ku ts’áako’ob xook ich maaya ti’al u ki’itbesiko’ob ba’ax u yojelo’ob yóok’lal k’áax beyxan yóok’lal ba’alche’ob ku yantalo’ob te’e baantao’.
Le meyaja’ táan u múul betiiko’ob yéetel xka’ansaj Janet Guardiola, ba’ale’ walkila’ táan u líik’sikubáajo’ob ti’al u béeytal u táakpajalo’ob tu múuch’tambalil Tercer Congreso Latinoamericano y del Caribe de Murciélagos, yaan u beeta’al le domingo 25 ti’ septiembre ku náats’ala’, tu noj kaajil Jo’.
También te puede interesar: Recaudan fondos para llevar a mujeres mayas al congreso de murciélagos
Aracely yéetel Gabrielae’ yaan u ts’áako’ob k’ajóoltbil tu táan jejeláas máako’ob ku taal ti’ uláak’ u noj lu’umilo’ob América Latina, xaak’al meyaj táan u beetiko’ob: Monitoreo de biodiversidad y educación ambiental en lengua maya, yéetel le ku kaxtiko’ob u tsolo’ob ba’ax seen kuxtal yaan tu kaajalo’obi’.
Ba’ale’ xch’úupalalo’ob yéetel xka’ansaje’ ma’ chuka’an u taak’inil ti’al u béeytal u táakpajlo’ob te’e múuch’tambalo’. Janete’ kaja’an Playa del Carmen, ts’o’okole’ k’a’anan u yáax k’uchul tu kaajil Tzucmuc, Chankom, ti’al u béeytal u láak’intik Aracely yéetel Gabriela tak Jo’.
U ti’al túun u béeytale’, táan u péeko’ob ti’ reedes soosyales ti’al u k’áatiko’ob ka much ts’a’abak ti’ob áantaj yéetel le taak’ino’, tumen u k’áato’ob u tsikbalto’ob jejeláas ba’al ichil le maaya t’aano’.
“Kéen jo’op’ok u tsoliko’ob ba’ax yaan te’e kaajo’, ku kaxtiko’ob ka tsela’ak le jejeláas k’aak’as tuukulo’ob yaan yóok’lal ba’alche’ob ti’al ma’ u loobilta’alo’ob. Je’el bix u p’ekta’al soots’ úuchik u yantal Covid-19”, tu tsikbaltaj Janet Guardiola.
Tu kaajil Playa del Carmene’, Janete’ ku beetik u nu’ukbesajil Espeleopeques y espeleochavos, ti’al mejen paalal yéetel táankelemo’ob ts’o’ok u chukik 6 u ja’abil, máaxo’ob ku béeytal u xíimbaltiko’ob áaktuno’ob ti’al u k’ajóoltiko’ob bix u yantalo’ob. Aracely yéetel Gabrielae’ táakpajo’ob ti’ le meyajo’, ts’o’okole’ tu biinsajo’ob tak tu kaajal ba’ax le tu kano’obo’.
Xak'alutskíinsa'an tumen: Sasil Sánchez Chan
