Kex tumen ya’abach ba’al talamchaj ti’ le jejeláas ba’al yaan u yil yéetel meyaj ti’ tuláakal yóok’ol kaab yóok’lal pak’be’en k’oja’ane’, ts’o’ok u béeykunstal u ya’abkunsa’al ko’olel ku táakpajal te’e meyajo’obo’, kex yóok’ol u 5.1 por siientoil ti’ le ts’ook óoxp’éel winalo’oba’, beey tu ya’alaj Luisa María Alcalde Luján, máax jo’olbesik Secretaría federal del Trabajo y Previsión Social.
Ichil ba’ax k’a’ayta’abe’, u ko’olel ku táakpajal te’e meyajo’obo’ chéen k’ucha’an ka’ach tu 40 por siientoil kaaj beetik u yantal náajal taak’in yéetel yaan kex 15 u ja’abil wa maanal ti’, ba’ale’ walkila’ ts’o’ok u k’uchul tak 45.1 por siientoil, le je’ela’ ku chíikbesik maanal 23 miyoonesil 600 mil u túul ko’olel.
U bin u ya’abtal ko’olel te’e meyajo’obo’, jump’éel ba’al chíika’an ti’ le winalo’ob ts’o’ok u yáalkabo’ob ti’ le ja’abil 2022a’.
Úuchik u beeta’al u múuch’tambalil Consejo Coordinador de Mujeres Empresarias, Alcalde Lujáne’ tu ya’alaj ichil nu’ukbesajo’ob ku beetiko’obe’, leti’ u táakbesa’al xlo’obayen ko’olel te’e meyajo’obo’, ts’o’okole’ lik’ul u ja’abil 2019e’ ma’ xu’uluk u táakbesa’alo’obi’, tumen yaan u nu’ukbesajil Jóvenes Construyendo el Futuro, tu’ux jts’a’ab meyaj kex ti’ maanal u 60 por siientoil ti’ leti’ob, tumen u ya’abile’ ma’ yáax meyajnako’ob mix juntéeni’, ts’o’okole’ le je’elo’ ku talamkúunsik u kaxtik meyaj.
También te puede interesar: Incrementa la participación de mujeres en el campo laboral: STPS
Uláak’ ba’ax tu ya’alaj Alcalde Lujáne’, leti’e’ ba’ax béeykunsa’an úuchik u beeta’al k’eexilo’ob tu a’almajt’aanil meyaj, ti’ le jejeláas ba’al yaan u yil yéetel síinidkatóo, tu’ux jets’a’abe’ tuláajal ba’ax kun jets’bile’ najmal u chíimpoltik u yóol ko’olel beyxan xiib.
“Yaan u káajal k-ilik u yantal ko’olel ku jo’olbesiko’ob sindikaatóos, máaxo’ob xan kéen u chíikbeso’ob ko’olel tu meyajo’ob. Beyxan ichil k’eexilo’ob beeta’abe’, a’alab najmal u yantal u nu’ukul u ch’éejsa’al péech’óol yóok’lal ko’olel wa xiib u wíinikil, beyxan u jach ila’al ba’ax ku yúuchul yéetel ch’a’apachtajil wa loobilajil tu meyaj máak”, tu ya’alaj.
Ya’abach juntéenake’, ti’ mejen mola’ayo’ob yéetel le ma’ jach táaj nojochtako’obe’, ma’ ojéela’an ba’ax najmal u beeta’al kéen loobilta’ak ko’olel, wa kéen ch’a’apachta’aki’, le beetike’ k’uba’ab jump’éel u nu’ukil u beeta’al ba’al, ti’al u ch’a’anukta’al tumen le mola’ayobo’.
U k’eexil a’almajt’aane’ tu jets’aj u yantal ti’ tuláakal mola’ayo’obe’ u nu’ukil u ts’aatáanta’al le si’ipil ba’alo’oba’, ba’ale’ beyxan ka yanak u nu’ukil u asab ma’alobkúunsa’al u meyaj máak, tu’ux ka chíimpolta’ak wa xiib, wa ko’olel u wíinikil, ti’al beyo’ u yantal utsil ba’alo’ob ka u beet u k’éexel ba’al.
Xak'alutskíinsa'an tumen: Sasil Sánchez Chan
