Ikil u kaxta’al ma’ u sa’atal le jejeláas ba’ax ku beeta’al tu péetlu’umil Yucatán, u mola’ayil Instituto Yucateco de Emprendedores (Iyem) tu k’a’aytaj u bolontéenil u beeta’al u ketlamil Concurso Estatal de Bordado Addy Rosa Cuaik, tu jo’oloj óoxp’éel ja’ab ch’éenek u beeta’al. Ketlame’ je’eb jo’oljeak yéetel yaan u k’a’alal tak le 14 ti’ octubre ku taala’. Beey túuno’, tu k’iinil 18 ti’ septiembre kéen xak’alta’ak meyajo’ob kun ketbilo’ob, tu kúuchil Gran Museo del Mundo Maya (GMM).
Máax jo’olbesik Desarrollo Artesanal, Paulina Viana Gómez, tu k’a’ajsaj tu ja’abil 2019e’ ka’aj ts’ook beeta’ab le ketlama’, tumen ch’éen u beeta’al ka’aj taal le pak’be’en k’oja’ano’.
También te puede interesar: Invitan a participar en Concurso de Bordado Addy Rosa Cuaik en Yucatán
“Ti’ le ketlama’ yaan u páajtal u táakpajal meyajo’ob ku beeta’al ti’ k’ab wa ti’ maakináa”, tu tsikbaltaj.
Uláak’ ba’ale’, yaan u béeytal u táakbesa’al meyajo’ob jejeláas bix u beeta’al, beyxan jejeláas u nu’ukulo’ob yéetel u chíikulal. Óox jaats jóok’sa’an ti’ le keetila’: chuuyil k’ab wa xokbil chuuy; u chuuyil makináa yéetel úuchben chuuyo’ob, je’el bix xmáanikte’, ichil uláak’o’ob.
Viana Gómeze’ tu ya’alaj taak’in jóok’sa’an ti’al u t’o’oxol ichil máaxo’ob kun náajale’, k’ucha’an tak 100 mil pesos, ba’ale’ yaan u ja’atsal ichil 24 máako’ob; yaan xan u k’u’ubul jump’éel chíimpolal tumen le noj lu’umo’, tu’ux yaan u ts’a’abal 20 mil pesos. Ti’ lalaj jaatsilo’ob le keetila’ yaan u yantal juntúul máax kun náajaltik yáax kúuchil, ti’ leti’ yaan u ts’a’abal 10 mil pesos; tu ka’a kúuchile’ yaan u ts’a’abal 7 mil; yéetel tu yóox kúuchile’, 5 mil pesos.
Yaan xan u ch’a’achibta’al u k’aaba’ máaxo’ob unaj u chíikbesa’alo’ob, ti’al máaxo’ob maanal 60 u ja’abil; ti’ leti’obe’ yaan u ts’a’abal mil pesos ti’ lalaj juntúul. Uláak’e’ yaan xan u ts’a’abal ti’al máaxo’ob ma’ u chuk 20 u ja’abili’.
Chuuy kun táakbesbile’ unaj ma’ máanak jump’éel ja’ab beeta’aki’, yéetel ma’ unaj yáax táakbesa’an ti’ mix uláak’ jump’éel ketlami’, tu ya’alaj Paulina Viana.
Tu k’oonol 31 ti’ octubre kéen k’u’ublajak chíimpolalo’ob yéetel náajalo’ob, ba’ale’ ma’ je’ets’ek tu’uxi’; je’elili’ u k’a’ayta’ale’.
Xak'alutskíinsa'an tumen: Sasil Sánchez Chan
