Walkila’ jach táaj piim yanik k’oxolo’ob tu noj kaajil Jo’. Le beetike’, u jo’olpóopil kaaj, Renán Barrera Concha, tu ya’alaje’ yaan u k’a’abéetkunsa’al maanal 10 miyoonesil pesos u ti’al u yantal u meyajil fúumigaasyon, tu’ux yaan u táakbesa’al 600 u p’éel u múuch’kajtalilo’ob Jo’, je’el bix xan u 47 méek’tankaajilo’obo’.
Le je’ela’ jump’éel meyaj ku táakmuk’tik xan ba’ax ku taal u beeta’al tumen Secretaría de Salud de Yucatán (SSY), tu ya’alaj jo’olpóop.
Beey túuno’, yóok’lal méek’tankaajo’obe’, Barrera Concha tu ya’alaje’, ti’ yaan u ya’abil tu’ux ku beeta’al repoortes, tumen kaajo’obe’ bak’pachta’an tumen k’áaxo’ob yéetel che’ob, ts’o’okole’ beey u yúuchul xan tu xamanil, u lak’inil yéetel u chik’inil Jo’, le beetike’ te’elo’ asab ya’ab u tóop’ol k’oxoli’; kex beyo’, u multa’al kaaje’ ti’ tuláakal kaaj ku yúuchul.
En español: Mérida invierte más de 10 mdp en labores de fumigación contra moscos
Le 24 ti’ septiembre máaniko’, u jo’olpóopilo’ob kaaj beyxan péetlu’ume’, tu k’a’aytajo’obe’ u meyajilo’ob fúumigaasyone’ yaan u beeta’al ichil 26 ti’ septiembre tak 7 ti’ octubre.
Máax jo’olbesik SSY, Mauricio Sauri Vivas, tu ya’alaje’ ja’ab man ja’abe’ ku mu’uk’ankúunsa’al le meyaja’ kéen káajak u k’iinil ja’ajalil, le beetike’ yaan u míista’al tuláakal noj kaaj uláak’ ka’ap’éel semaanáa, ti’al u yutsil jump’éel miyoon 250 kajnáalo’ob, ti’al u yila’al ma’ u tsa’ayal k’oja’ano’ob ku ts’áak le k’oxolo’obo’.
U yáax meyajil míis beeta’ab tu kaajil Jo’e’, úuch ichil 12 tak 22 ti’ septiembre. Fúumigarta’ab 12 mil 647 eektareas, yéetel ka’abéetkunsa’ab 30 kiis buuts’o’ob.
Te’e k’iino’oba’ máana’, beeta’ab meyajo’ob tu múuch’kajtalilo’ob Chablekal, Sitpach, Santa María Chí, Yaxché, San Pedro Cholul, Floresta, Salvia, Tixcuytún, tu sooloojikosil Animaya yéetel Centenario, tu k’íiwikilo’ob Deportes Extremos, CEMCA, Juan B. Sosa, Loma Bonita, Chuburná, Bugambilias, San Pedro Uxmal, Lindavista, Dzityá, ichil uláak’o’ob.
Xak'alutskíinsa'an tumen: Sasil Sánchez Chan
