Jala’ach Mauricio Vila Dosal tu ts’áaj k’ajóoltbil le lunes máanika’, u nu’ukbesjial Yucatán Digital. Le je’ela’, jump’éel meyaj yéetel le táan u kaxta’al u túumbenkunsa’al bix meyaj u mola’ayilo’ob le péetlu’uma’, je’el bix xan Fiscalía, ti’al u páajtal u yantal múul meyaj yéetel Poder Judicial. Yóok’lal túun le je’ela’, tu ya’alaj jala’ach, yaan u séebkunsa’al u máanil ku yantal u beeta’al yóok’lal wa ba’ax meyajil, beyxan ti’al u yutsil béeytal u k’amik máak justiisya.
K’a’aytaje’, beeta’ab tu kúuchil Siglo XXI, tu’ux a’alabe’, Yucatán Digital ku meyaj yéetel téeknolojia, tumen yaan u k’a’abéetkunsa’al fribra ooptikáa, ti’al u k’ujsa’al Internet tuláakal tu’ux ti’ u lu’umil Yucatán.
Beyxan, u jala’achil u lu’umil Yucatáne’ tu jets’aje’ yaan u k’ujsik Internet ti’ le 2 mil 400 u p’éel najilo’ob xook baasika yéetel meedia súuperior kaambal; ti’ le 280 u p’éel u kúuchilo’ob ts’ak yaj; ti’ u Módulosil 24/7; beyxan ti’ u 600 u p’éel u kúuchilo’ob meyaj jala’ach yéetel u noj k’íiwikilo’ob tuláakal méek’tankaajo’ob.
En español: Yucatán Digital busca agilizar los trámites y el acceso a la justicia
Beey túuno’, Vila Dosal tu ya’alaje’ jaaj yaan tu’ux óol paachil ynaik kaajo’ob tumen mina’an téeknolojiai’, le beetike’ yaan u yúuchul múul meyaj yéetel Fiscalía General del Estado (FGE) beyxan yéetel Poder Judicial.
Le beetike’ táan u beeta’al u nu’ukbesajil Fiscalía Digital, tu’ux “ts’o’ok u k’áata’al ti’ fiskale’ ka yanak u ts’áak meyaj jump’éel pláataforma, yáax juntéen bíin k’a’abéetkunsa’al Yucatán, ti’al u séebchajal u ts’aatáanta’al máak, tu’ux ka yanak xan u jaatsil meyaj fóormalisadáa xaak’al, yéetel míinisteeryo puublikóo”, tu ya’alaj jala’ach.
Uláak’ ba’ale’ yaan u láaj díijitalisarta’al éexpedienteso’ob, le beetike’ yaan u páajtal u jach ila’al ba’ax ku yúuchul yéetel tak poolo’ob ku beeta’al tu táan míinisteeryos. Beey túuno’, yéetel le je’ela’ yaan u p’íitkunsa’al le beyka’aj ku xáantal u páa’ta’al ti’al u beeta’al tak pool; beyxan ti’al u béeytal u yojéelta’al jach bix u bin ba’al yéetel.
U jala’achil u lu’umil Yucatáne’ yaan xan u ts’áak u páajtalil u k’áata’al ti’ Internete’ k’a’anan ju’uno’ob chéen ku béeytal u k’áata’al walkila’ kéen xi’ik máak tak fíiskalia, je’el bix antecedentes no penales.
Yóok’lal ba’ax yaan u yil yéetel Poder Judiciale’, jala’ache’ tu ya’alaje’ ts’o’ok u káajal u beeta’al tsikbalo’ob ti’al u túumbenkunsa’al u kúuchilo’obi’, beyxan nu’ukulo’ob ku k’a’abéetkunsa’al. Le beetike’, táan u tukulta’al u yantal Justicia Digital ti’al u béeytal xan u séebkunsa’al traamites, yéetel xan u ts’a’abal jump’éel túumben pláataforma, u túumbenkunsa’al u nu’ukulil u táabsa’al cha’ano’ob, u kóomputaarta¡al juusyos, je’el bix xan u káajal u k’a’abéetkunsa’al fiirmáa éelektroonikáa.
Xak'alutskíinsa'an tumen: Sasil Sánchez Chan
