Ikil táan u yáalkab u winalil u asab xakaltik máak u wíinkilal ti’al ma’ u tsa’ayal u ts’unusil iime’, u mola’ayil Secretaría de Salud de Quintana Roo (Sesa) táan u jach péekstsiltik meyaj suuka’an u beetik ti’al u páayt’antik kaaj ti’al u xak’altik wíinik u wíinkilal ti’al u yilik wa tsaayal ti’, wa ma’, ts’o’okole’ ku k’a’ajsik xan ti’ ko’olel bix unaj u kaláantikubáaj yéetel ku mantats’ a’alik wa ku séeb il máake’ je’el u séeb ts’aatáanta’ale’.
Sesae’ je’el u beetik ka’ap’éel prueba ti’al u séeb ila’al wa tsaayal, wa ma’; te’e yáaxo’ ka xak’alta’al iim; le je’ela’ unaj u beetik ko’olel ja’ab man ja’ab wa yaan u ja’abil ichil 25 tak 39. U ka’ap’éelile’, leti’e’ mastografíao’, unaj u beetik ko’olel lalaj ka’ap’éel ja’ab wa yaan u ja’abil ichil 40 tak 69.
Mastografíae’ xma’ bo’olil u beeta’al bul ja’ab ti’al ko’olel táaka’an u k’aaba’ Insabi, wa le ma’ ts’íibta’an u k’aaba’ ichil Uneme Dedicam wa uláak’ najilo’ob ts’akyaj tu’ux ku beeta’al mastografíasi’.
Tu mola’ayil Sesae’ ku beeta’al táamisaje yéetel le mastografíao’, tu méek’tankaajilo’ob Othón P. Blanco (Uneme Dedicam de Chetumal), Benito Juárez (Uneme Dedicam de Cancún), Solidaridad (Hospital General de Playa del Carmen), Lázaro Cárdenas (Hospital Integral de Kantunilkín) yéetel José María Morelos (Hospital Integral de José María Morelos).
En español: Ofrece Sesa pruebas gratuitas para la detección de cáncer de mama
Wa tu noj kaajil Chetumal ku bin máake’ unaj u yáax t’aan tu numeroil 983 18 13 266, ichil láas 7 ja’atskab k’iin tak 13 u taal u chíinil k’iin tu kúuchil toj óolal noj kaaj 6; beyxan tu numeroil 983 15 72 861 ichil láas 8 tak 6 tu taal u yáak’abtal, tu kúuchil toj óolal noj kaaj 1, yéetel 983 12 65 075 ichil láas 8 tak láas 4 u taal u chíinil k’iin, lunes tak viernes, tu kúuchil toj óolal noj kaaj Las Américas.
Tu noj kaajil Cancúne’ unaj u t’aan máak ichil láas 8 tak láa 1 u taal u chíinil k’iin, tu númeroil 998 33 54 519 tu kúuchil toj óolal noj kaaj 16; tu númeroil 998 20 46 696 ichil 8 ja’atskab k’iin tak 2 u taal u chíinil k’iin tu kúuchil toj óolal noj kaaj 10 yéetel 983 83 15 715 ichil láas 7 ja’atskab k’iin tak 12:30 chúumuk k’iin tu kúuchil toj óolal noj kaaj 1.
Xak'alutskíinsa'an tumen: Sasil Sánchez Chan
