Óscar Sabido Santana, máax jo’olbesik Comisión de Derechos Humanos de Yucatán (Codhey), tu ya’alaje’ u jo’olpóopilo’ob u péetlu’umil Yucatán yéetel u jo’olpóopilo’ob kaambale’ k’a’abéet u jatsiko’ob uláak’ taak’in ti’al u ts’a’abal nu’ukulo’ob, u yuumil meyaj, yéetel kúuchilo’ob k’a’abéet ti’al u no’oja’an ts’aatáanta’al máaxo’ob kuxa’an yéetel díiskapasiidad, tumen chéen ja’alil beyo’, yaan u chíimpolta’al tu beel u páajtalil u kaambalo’ob je’ex unaje’.
Ya’abach ti’ le tak poolo’ob ku beeta’al tu táan mola’aye’ yaan ba’al u yil yéetel máax kuxa’an yéetel díiskapasiidade’ ku beeta’al yóok’lal kaambal wa xook, tumen ku chukik tak dos por siientoil ti’ tuláakal t’aano’ob ku beeta’ali’.
En español: Yucatán: Rezagos en accesibilidad, reto para la inclusión de personas con discapacidad
Beey túuno’, Sabido Santanae’ tu ya’alaje’ u ya’abil talamo’obe’ yaan tumen kúuchilo’obe’ ma’ beeta’an tu beel ti’al u páajtal u k’a’amal máaxo’ob yaan ti’ob díiskapasiidad, yéetel tumen wa ka k’uchuk okole’ ma’ tu yutstal u máan ichil le kúuchilo’.
Beyxan, tu tsikbaltaje’ ts’o’ok u k’a’amal tak poolo’ob tumen tu najilo’ob xook máaxo’ob yaan ti’ob díiskapasiidade’ mina’an u yuumil k’a’abéet ti’al u ts’a’abal xook je’el bix najmal u yúuchulo’.
Túumbenkunsa’ab Comité yóok’lal máaxo’ob kuxa’ano’ob yéetel díiskapasiidad
Le viernes 14 ti’ octubre máanika’, ook u túumben yuumilo’ob táakano’ob Comité Técnico de Consulta del Mecanismo Estatal de Monitoreo Independiente de la Convención de los Derechos de las Personas con Discapacidad ti’ u mola’ayil Codhey.
Ichil múuch’kabil káaj u meyaj tu ja’abil 2017e’, táaka’an máaxo’ob chíikbesik u múuch’kabilo’ob kaaj kaláantik u páajtalilo’ob máaxo’ob yaan ti’ díiskapasiidad, je’el bix xan máaxo’ob kuxa’ano’ob yéetel díiskapasiidad; yaan xan máako’ob jach kaambanaja’ano’ob yóok’lal le ba’alo’oba’, ichil uláak’o’ob.
Xak'alutskíinsa'an tumen: Sasil Sánchez Chan
