U Congresoil Yucatán tu mokt’antaj le martes máanika’, múul meyaj yéetel Fondo de las Naciones Unidas para la Infancia (Unicef) ti’al u ts’aatáanta’al u páajtalil paalal ti’al u yutsil tséenta’al paalal (t’a’aj, chúuka’an yéetel je’ex unaje’), beyxan ti’al kaláanta’al u toj óolal paalal yéetel táankelemo’ob.
Meyaje’ péektsilta’ab tumen máax jo’olbesik Comisión de Salud y Seguridad Social, Dafne López Osorio, máax táaka’an ichil Partido Acción Nacional (PAN). Uláak’ ba’ale’, yaan xan u kaxta’al ka yanak u jeel meyajo’ob tumen máaxo’ob jets’ik a’almajt’aano’obe’ ti’al u yantal uláak’ utsil ba’al ti’al paalal.
Ti’al ka béeyake’, k’a’ayta’ab yaan u beeta’al nu’ukbesajo’ob, noj meyajo’ob, xaak’alo’ob, péeksajilo’ob, k’a’aytajilo’ob, ichil uláak’ ba’alo’ob, ti’al u ts’a’abal ojéeltbil jejeláas ba’alo’ob yóok’lal bix najmal u tséenta’al paalal, beyxan bix unaj u kaláanta’al toj óolal.
En español: Congreso de Yucatán y Unicef buscan garantizar salud y alimentación a menores
Yéetel mokt’aan beeta’abe’ táan u kaxta’al u yojéelta’al jejeláas ba’alo’ob yóok’lal bix u tséenta’al paalal, ti’al beyo’ kéen péektsilta’ak wa ba’ax a’almajt’aanil u ti’ale’, sáasil yanik ti’al u yantal utsil meyaj; ba’ax kun jóok’ol te’e xaak’al kun beetbile’ yaan u ts’a’abal k’ajóoltbil xan.
Le beetike’, meyajo’ob, a’almajt’aano’ob wa u nu’uktajilo’ob meyaj kun beetbil ti’al u yutsil tséenta’al paalal, wa ko’olel ti k’iin yo’omchaja’ane’, wa táankelemo’obe’, yaan u jach kaláanta’al bix u beeta’al.
Ts’o’okole’, yaan xan u beeta’al múul meyajo’ob bíin núupuko’ob yéetel u mola’ayilo’ob toj óolal ti’al u yantal u nu’ukul u beeta’al, beyxan ti’al u yojéelta’al wa tu beel ba’ax táan u meyajta’al te’e tu’ux ku beeta’al a’almajt’aano’ob, yóok’lal toj óolal yéetel tséentajil.
Xak'alutskíinsa'an tumen: Sasil Sánchez Chan
