Kajnáalo’ob biinsik u paalalo’ob te’e najilo’ob xook yaan ti’ u kaajil Sabancuye’ táan u k’áatiko’ob ka yanak u ka’ansal maaya t’aan ti’ u yóoxlajunp’éel méek’tankaajilo’ob Kaanpech, ti’al beyo’ u ka’a tóoch’ta’al le t’aano’; le je’ela’ a’alab úuchik u beeta’al Ruta de la Educación, meyajta’ab tu kaajil Chicbul, ts’o’okole jo’olbesa’ab tumen u meyajnáalil le nu’ukbesajo’, Raúl Aarón Pozos Lanz.
Te’e múuch’ilo’, táakpaj máaxo’ob jo’olbesik najilo’ob xook, súuperbisoro’ob, ajka’ansajo’ob yéetel taatatsilo’ob. Tsikbalta’ab ba’ax ku binetik te’e najilo’ob xook tu baantail Zona de los Ríos yéetel Sabancuy; k’áata’ab ka yanak u beeta’al doomóos, aaulas, beyxan ka ts’a’abak u nu’ukulil u cho’obol ba’al, ti’al kaambal, ichil uláak’ ba’alo’ob.
U ka’ansa’al maaya
“To’one’ taatatsilo’on Sabancuy yéetel Mamantel, méek’tant’a’ano’on tumen u kaajil Carmen, ba’ale’ míin to’one’ ma’ táakbesa’ano’on ti’ nu’ukbesajo’ob ku beeta’al ti’al u péektsila’al maayat’aan”, tu ya’alaj Martha Vera Cruz, juntúul ko’olel ku biinsik u paalil ti’ jump’éel u najil xook tu kaajil Plan de Ayala.
“Táan k-a’alike’ ka táakbesa’ak ichil xooke’, -kex ma’ ti’al u ja’abil 2022-2023, ti’al le ku taalo’- ka beeta’ak meyajo’ob ti’al u péektsilta’al le t’aana’ -kyáax t’aanil- ti’al u ka’anal tumen paalal beyxan táankelemo’ob ku bino’ob te’e najilo’ob xooko’, ichil tuláakal ja’abilo’ob kaambal, ti’al beyo’ ma’ u ch’éejel”.
En español: Campeche: Solicitan enseñanza de lengua maya en todos los niveles educativos
Tu tsikbaltaj walkila’, jala’ache’ ts’o’ok u ch’a’ak u k’a’ayte’ ku k’a’abéetkunsik bin le maayao’ óoli’ ti’ tuláakal ba’ax ku beetik, ba’ale’ chéen ku beetik te’e noj kaajo’obo’, Calkiní, Hecelchakán, Hopelchén, Tenabo, Dzibalché y Calakmul.
“Tu baantail Sabancuy yéetel tu méekt’ankaajil Carmene’ ki’imak k-óol yéetel kch’i’ibal, le beetike’ k-k’áatik ka táakbesa’ako’on ichil tuláakal nu’ukbesajo’ob ku beeta’al ti’al u péektsilta’al maaya ti’ kpaalal”.
Xak'alutskíinsa'an tumen: Sasil Sánchez Chan
