Le 25, 26 yéetel 27 ti’ noviembre ku taala’ yaan u beeta’al U Yóoxtéen Cha’anil Chi’ikam tu kaajil Maxcanú, tu’ux yaan u béeytal u yila’al yéetel u cha’anta’al jejeláas janalo’ob, meyaj k’abo’ob yéetel máaxo’ob meyajtik wa pak’ik chi’ikam; tak walkila’ 25 u túul máax pak’ik te’e méek’tankaajo’.
Jbeet janal José Rodríguez Cih, máax jo’olbesik múuch’kabil beetik cha’ane’ tu ya’alaje’ u tuukulil le meyaja’ yanchaj ka’alikil táan pak’be’en k’oja’an, ts’o’okole’ chéen ti’ Internet ku tukulta’al u beeta’al ka’achij.
“T-k’ajóoltaj le 25 kolnáalo’ob pak’ik chi’ikam tu kaajil Maxcanú, le beetik yanchaj u múuch’kabil La Tierra de la Jícama, ti’al u beeytal u yojéelta’al máaxo’obi’, ti’al xan u béeytal u ts’a’abal uláak’ nu’ukulo’ob ti’al u k’ajóolta’al ba’ax ku beetiko’ob, tumen u ya’abile’ nojoch máako’ob”, tu tsikbaltaj.
En español: Realizarán tercera edición del Festival de la Jícama en Maxcanú: Programa
Ka’aj beeta’ab tu ka’atéenile’, xa’ak’an úuchik u meyajta’al: ti’ Internet, ba’ale’ yaan xan ba’alo’ob beeta’ab tu’ux tu yilubáaj máak.
“Te’e ja’aba’, jets’a’ab u beeta’al tu’ux ka u yilubáaj máak, ichil u k’iinil 25, 26 yéetel 27 ti’ noviembre, ti’al beyo’ u túunta’al u chi’ikamil Maxcanú tumen jach ki’ le ku yantal te’elo’”, tu tsikbaltaj Rodríguez Cih.
Tu k’iinil 25e’, yaan u beeta’al báaqueryae’ kéen chúunsa’ak cha’an, láas 7 áak’ab. Kex beyo’, yaan u ts’a’abal jejeláas tu’uk’ilo’ob ti’al u cha’anta’al ba’alo’ob yéetel yaan u táakpajal kex 60 u túul ajmeyaj k’abo’ob, máaxo’ob meyajtik yéetel pak’ik chi’ikam.
Ti’al u k’iinil 26e’, Rodríguez Cihe’ tu tsikbaltaj yaan u beeta’al jejeláas miatsil cha’ano’ob tu ja’atskabil k’iin.
“Tjets’aj kbeetik U bejil chi’ikam, ti’al u béeytal u cha’anta’al bix u pa’ak’al chi’ikam, u k’ajóolta’al jejeláas ba’alo’ob yéetel tak u páanal te’e lu’umo’. Leti’e’ ba’ax táan u beeta’al ti’al cha’antbil walkila’”, tu yalaj.
Láayli’ te’e k’iino’, kéen káajak u chíinil k’iine’, yaan xan u yantal óok’ot yéetel paax. Ti’al domingoe’, yaan u beeta’al uláak’ xíimbalilo’ob yéetel meyajo’ob yaan ba’al u yil yéetel chi’ikam.
Xak'alutskíinsa'an tumen: Sasil Sánchez Chan
