U múuch’kabil áastroturismoe’ Miatsil Maya, ku meyaj tu méek’tankaajil José María Morelos, tu náajaltaj u yáax kúuchil, tu jaatsil Categoría A, ti’ u yóox ketlamil Premio a la Innovación y Diversificación Turística en el Caribe Mexicano 2022, ku k’u’ubul tumen u mola’ayil Secretaría de Turismo del estado (Sedetur).
Jka’ansaj José Guillerme Talavera Lucero tu tsolaje’, meyaj chíimpolta’abe’ yanchaj ichil u múuch’il siiensya yéetel téeknolojia Tepeu Yetel Naab, ku meyaj tu puksi’ik’al Universidad Intercultural Maya de Quintana Roo (Uimqroo), tu’ux ku múul beeta’al jejeláas meyajo’obi’.
Beyxan tu tsikbaltaje’, te’e múuch’o’ táaka’an uláak’ táankelemo’ob u ts’o’oksmaj u xooko’ob te’e Uimqroo; ichilo’obe’ ti’ yaan Evaristo Vazquez máax jo’olbesik le múuch’ilo’; Patricia Ruiz, Claudia Pérez, Dailan Díaz, Celia Pérez, Carlos Álvarez yéetel Hadid Arguello, máaxo’ob jo’olbesik u jejeláasil jaats meyajo’ob yaan ba’al u yil yéetel ba’ax tu xokajo’ob.
En español: Estudiantes de Uimqroo ganan premio a la innovación con proyecto de turismo astronómico
“Uláak’ ba’ale’, to’one’ kmúul meyaj xan yéetel u mola’ayil turiismo tu méek’tankaajil José María Morelos ti’al u beeta’al u meyaj páarador yaan te’elo’. Ichil meyajo’obe’ ti’ yaan kaampinj, u cha’anta’al ba’al ti’ téeleskoopio, u k’ajóolta’an eek’o’ob, u k’a’abéetkunsa’al u pláanisferyos áastronomikóos, u p’i’isil beyka’aj k’askúunta’an sáasil yéetel u yáantajil fotoometróo, ichil uláak’ ba’alo’ob”, tu tsikbaltaj Talavera Lucero.
Tu ya’alaj xane’, tukulta’ab u beeta’al le meyaja’ tumen tu kaajil José María Morelos mina’an uláak’ jump’éel meyaj yaan ba’al u yil yéetel u beeta’al náaysaj óol ikil u cha’anta’al ka’an.
"K’a’anan u ya’alale’ yóok’lal chíimpolal tu k’amajo’obe’ béeychaj u ma’anal nu’ukulo’ob ti’al u meyajo’ob, je’el bix u tiiendasil káampanya, óoxp’éel teleskoopis, ichil uláak’ ba’alo’ob”, tu tsikbaltaj Talavera Lucero.
Xak'alutskíinsa'an tumen: Sasil Sánchez Chan
