U mola’ayil Secretaría de Medio Ambiente y Recursos Naturales (Semarnat) tu ts’áaj k’ajóoltbil u xaak’alil Manifestación de Impacto Ambiental (MIA) éejenta’an ti’al u jaatsil 6 Tren Maya; beje’ ku yáalkab Tulum tak Chetumal.
“Ju’un éejenta’abe’ yaan u béeytal u k’a’abéetkunsa’al tu jo’oloj ka’ap’éel ja’ab, ti’al beyo’, u béeytal u meyajta’al k’áax yéetel u líik’sa’al ba’ax k’a’abéet ti’al le noj meyajo’. Beyxan, jets’a’an 50 ja’abo’ob u biijensyail, ti’al u béeytal u meyaj yéetel u yutsikíinsa’al le bejo’, ba’ale’ lelo’ yaan jéets’el tu beel je’el bix u in u beeta’al noj meyaj”, ku xo’okol te’e ju’uno’.
En español: Publica Semarnat la MIA autorizada al tramo 6 del Tren Maya
Ichil áambiental pik’il ju’un 53e’, jóok’sa’an ichil u k’iinil 3 tak 9 ti’ noviembre ti’ u ja’abil 2022e’, mola’aye’ ku ya’alik le noj meyajo’, ts’a’aban u xookolil 23QR2022V0040, táan u yilik yaan ba’alob kun k’éexel ti’ u ba’alumbáaj le k’áaxo’ “tumen yaan u k’éexel ba’ax ti’al ku k’a’abéetkunsa’al mil 459.05 u ektaareasil k’áax”.
Beey túuno’, le k’áaxo’oba’ ti’ yano’ob ichil u méek’tankaajilo’ob Tulum, Felipe Carrillo Puerto, Bacalar yéetel Othón P. Blanco.
“Tumen u beel Tren yaan u k’áatal ti’ jump’éel k’áax jatsa’an beey Área Destinada Voluntariamente a la Conservación (ADVC), máax beetik meyaje’ (Fonatur) yaan u yantal u yáantik kaaj máax ti’ yaan le ju’uno’, ti’al u beeta’al u nu’ukbesajil u yutsil k’a’abéetlkunsa’al k’áax, ich múul meyaj ichil máaxo’ob ti’alintik ADVC yéetel Conanp (Comisión Nacional de Áreas Naturales Protegidas)”, beey ku xo’okol ti’ ju’un ts’a’ab k’ajóoltbil tumen Semarnat.
MIA beeta’an ti’al le baantao’, meyajta’ab tumen Fonatur Tren Maya SA de CV, oksa’ab tu mola’ayil Semarnat le 4 ti’ agosto máaniko’; ichil u k’iinil 5 yéetel 8 ti’ agostoe’ k’áata’ab tumen Semarnat u teeknikoil tuukul u jejeláasil mola’ayob, tu’ux táakbesa’ab tak u méek’tankaajilo’ob tu’ux kun máan u beel le Treno’. Ka’aj ts’o’oke’, ti’al u k’iinil 6 ti’ septiembree’ beeta’ab jump’éel múuch’tambal tu táan kaaj, ti’al u ts’a’abal k’ajóoltbil jejeláas ba’alo’ob yóok’lal le meyajo’. Ti’ beeta’ab tu éejidal najil X-Hazil, tu méek’tankaajil Felipe Carrillo Puerto.
Tu ts’ooke’, le 12 ti’ septiembre máaniko’, u mola’ayil Semarnate’ tu k’a’aytaj ba’ax tu jets’aj. Leti’e’ túun le ku k’a’aytal walkila’.
Xak'alutskíinsa'an tumen: Sasil Sánchez Chan
