“Xu’uluk u tsikbalta’al k-kuxtal tumen sak wíiniko’ob”, u t’aanil jump’éel cha’an ku k’aba’tik Descoloniza: Luchas que resuenan en Latinoamérica, yaan u ts’a’abal cha’antbil bejla’a 18 ti’ noviembre, tu kúuchil Centro Cultural Olimpo, beeta’an tumen Aj + en Español.
U meyajil u ye’esa’al le cha’ano’oba’ táan u péektsilta’al tumen Narrativas Desde La Mayanidad, Coordinadora de Mujeres Mayas de Quintana Roo yéetel u Ayuntamientoil Jo’.
Múuch’ilo’obe beetik le meyaja’, tu ya’alo’obe’ u cha’anil Descoloniza táan u kaxtik u chíikbesik u k’ajla’ayil yéetel líik’saj t’aano’ob yaan ba’ale’ ma’ tu jach e’esal ti’ u nu’ukulil u k’a’aytal péektsilo’ob úuch yanak.
En español: ''Ya basta de que los blancos cuenten nuestras historias'', exponen en documental
“Cha’ane’ ku péeksik u yóol máak ilik tumen ku ye’esik máako’ob jejeláas bix u péech’óolta’alob, tumen leti’obe’ ku yantal u kaxtik ba’ax u beeto’ob yéetel u yaj óolalo’ob, ts’o’okole’ ku yantal u péeko’ob ti’al u k’éexel ba’al u ti’alo’ob tu paachil k’iin, ku péeko’ob tu kaajalo’ob”, tu ya’alajo’ob.
Xkóomunikadora afroperuanail Natalia Barrera Francis, “Una Chica Afroperuana”, je’el bix u patmaj u k’aaba’ ti’ reedes sosiyalese’, leti’ kun presentartik le cha’ana’, ts’o’okole’ leti’ t’a’ana’ab beey iinbitada espesyal, ti’al le e’esajila’.
Beyxan yaan u táakapajal Sara Oliveros ti’ u múuch’kabil U Yich Lu'um, Grecia Gutiérrez yéetel Cristian Rodríguez ti’ u múuch’kabil Coordinadora de Mujeres Mayas de Quintana Roo.
Tu ja’abil 2019e’, Natalia Barrera, múul meyajnaj yéetel u produxiionil Aj +. Tu xíimbaltajo’ob jo’op’éel u noj lu’umilo’ob Latinoamérica ti’al u k’ajóoltiko’ob jejeláas máako’ob ku ketiko’ob ba’ax ku ya’alal, ba’ax jets’a’an, ba’ax ku tukulta’al yóok’lal wíinik, beyxan yóok’lal ba’alo’ob jeets’el najmal u ya’alal wa u beeta’al kex tumen táanxel tu’ux u taal u tuukulil.
Xak'alutskíinsa'an tumen: Sasil Sánchez Chan
