Ichil ba’ax xoka’an tumen Secretaría de Protección y Seguridad Ciudadana (SPSC), u loobilta’al ko’olel tu péetlu’umil Kaanpeche’ láayli’ chíika’an, ts’o’okole’ u ya’abile’ ku yúuchil ti’al fines de semanáa; u ya’abil máax beetike’ káaltal máako’ob, le beetike’ u molaa’yil Instituto de la Mujer del Estado de Campeche (IMEC) táan u líik’sikubáaj, ti’al u beetik “16 k’iinilo’ob meyaj, ti’al u kaxta’al ka xu’uluk u loobilta’al ko’olel”. U tuukulile’ ka ts’o’okok 10 ti’ diciembre. A’alab tumen Comunicación Social ti’ le mola’aye’, maanal 100 u p’éel meyaj tukulta’an u beeta’al te’e k’iino’obo’.
“Le 16 k’iino’oba’ jump’éel péektsil ku beeta’al ja’ab man ja’ab, lalaj 25 ti’ noviembre, tumen ku máan u k’iinil Día Internacional para la Eliminación de la Violencia contra las Mujeres, yéetel ku ts’o’okol tu k’iinil 10 ti’ diciembre, Día de los Derechos Humanos”, beey a’alab ti’ jump’éel u tsoolil IMEC, k’uba’ab ti’ La Jornada Maya.
En español: Campeche ofrecerá 16 días de activismo contra la violencia a las mujeres
Meyaje’ patjo’olta’ab tumen u meyajnáalilo’ob Instituto para el Liderazgo Global de las Mujeres, tu ja’abil 1991 ka’aj káaj u meyaj mola’ay. Beey túuno’, Instituto Nacional de las Mujeres yéetel Instituto de la Mujer del Estado de Campeche, yaan u beetiko’ob kex 170 u p’éel meyajo’ob, tu’ux yaan u táakbeesa’al uláak’ mola’ayob ti’al u mu’uk’ankúunsa’al ba’ax ku beeta’al.
Instituto de la Mujer yaan xan u beetik uláak’ meyajo’ob, je’el bix u péeksajil Sororidad de Mujer a Mujer, yaan u beeta’al ka’alikil táan le 16 k’iino’obo’; yaan u tse’ektal tumen Jessica Hernández “Más allá del Rosa”, tu kúuchil Circo Teatro Renacimiento, le 25 ti’ noviembrea’, láas 7 áak’ab.
Yaan u beeta’al e’esajilo’ob, ts’o’okole’ yaan xan u péektsilta’alo’ob ti’ u reedes sosyalesil Instituto de la Mujer del Estado, ti’al u yojéelta’al ba’ax le ku beeta’alo’, ts’o’okole’ yaan u táakbesa’al xoknáalo’ob, u ajmeyajilo’ob jala’ach, je’el bix xan mola’ayo’ob justiisya yéetel kananil.
Xak'alutskíinsa'an tumen: Sasil Sánchez Chan
