Tu múuch’il Presupuesto, Patrimonio Estatal yéetel Municipal káajsa’ab, le jueves máanika’, u xak’alta’al wa yaan u ts’a’abal máatbil, wa ma’, jump’éel kúuchil u ti’añ ñe péetlu’uma’, p’aatal tu méek’tankaajil Tekax, ti’al u beeta’al Instituto de Salud para el Bienestar.
Yóok’lal le je’ela’, u jpat a’almajt’aanil Partido Acción Nacional (PAN), Víctor Hugo Lozano Poveda, tu k’a’ajsaj te’e k’iino’oba’ éejenta’ab xan u ts’a’abal máatbil jump’éel kúuchil yaan Ticul ti’al u béeytal u beeta’al u najil ts’akyaj te’e méek’tankaajo’, le beetik túun walkila’ táan u yila’al ka yanak uláak’ jump’éel kúuchil ba’ale’ Tekax, ti’al u ts’a’abal meyaj ti’al u yutsil kaaj.
En español: Tekax se suma a las actividades por el Mes de la Diversidad Sexual
Leti’e’, tu k’áataj ka utsik pakta’ak yéetel ka táakumuk’ta’ak le ba’ax ku tukulta’ala’, ts’o’okole’ jts’a’ab k’ajóoltbil tu táan máax beetik secretariail gobernación, María Fritz Sierra, tu séeba’anil; “páayt’aan ku beeta’ale’ u ti’al u káajal u beeta’al u ju’unil le tuukul yana’, ti’al u séeb ts’aatáanta’al u toj óolal yéetel u kuxtal kajnáalo’ob yaan te’e baanta’a”, tu tsikbaltaj.
Láayli’ tu múuch’kabil PANe’, xpat a’almajt’aan Carmen González Martín, tu ya’alaje’ mokt’aane’ beeta’ab tu k’iinil 10 ti’ diciembre ti’ u ja’abil 2020, tu’ux a’alab xane’ najmal u ts’a’abal xan u nu’ukulil yéetel máaxo’ob kun meyaj ti’al u xíimbal le kúuchil ts’akyajo’. “Wa yóok’lal ba’alo’ob yana ba’al u yil yéetel u toj óolal kaaje’, unaj u meyaj tuláakal máak u ti’al”.
Leti’e’ tu k’áataj ka yanak áantaj, tumen beyo’ je’el u kaxta’al tuláakal ba’ax k’a’abéet ti’al ma’ u k’ata’al u beel u chúukpajal u nu’ukulil yéetel u ba’alilo’ob k’a’abéet ti’al u kaláanta’al u toj óolal kajnáalo’ob.
Beyxan, jpat a’almajt’aan Crescencio Gutiérrez González, ti’ u múuch’kabil Nueva Alianza, páayt’aanaj ti’al u táakmuk’ta’al le ba’ax ku k’áata’ala’, ti’al u kaajilo’ob u noojolil Yucatán, tumen jach k’a’abéet u séeb k’ujsa’al yiknalo’ob.
Xpat a’almajt’aan Fabiola Loeza Novelo láayli’ tu táakmuk’taj le ba’ax ku tukulta’ala’ tumen ku chíimpoltik meyaj najmal u yantal ti’al u yutsil kuxtal wíinik, tumen leti’ u jach k’a’ananilo’.
Xak'alutskíinsa'an tumen: Sasil Sánchez Chan
