Kaanpech yéetel Yucatáne’ ti’ yano’ob ichil le jo’op’éel péetlu’umo’ob tu’ux asab ko’ojchaja’an ba’alo’ob ichil tuláakal u noj lu’umil México, le je’ela’ beey chíikpaja’an ti’ le beyka’aj k’iino’ob ts’o’ok u yáalkab ti’ le ja’aba’ tak tu yáax kinsee k’iinilo’ob noviembre ti’ le ja’abil 2022a’, beey úuchik u ya’alal tumen Observatorio Económico de México ¿Cómo Vamos?
Ichil uláak’ ba’alo’ob a’alabe’, u ko’ojil ba’al, wa íinflasyone’, ti’ yaan ichil 10.3 por siientoil yéetel 10.1 por siientoil, le beetik le péetlu’umoba’ ti’ p’aatal ichil u ka’a kúuchil yéetel u kan kúuchil; ka’alikil Quintana Rooe’, u ko’ojtal ba’ale’ náakal 8.4 por siiento, ba’ale’ leti’e’ p’aatal tu kúuchil kinsee.
En español: Campeche y Yucatán, entre los cinco estados con mayor inflación: Observatorio
Péetlu’umo’ob tu’ux ts’o’ok u asab ko’ojta’al ba’al, ichil tulaákal México, tak tu yáax kinsee k’iinilo’ob noviembre, ti’ u ja’abil 2022, leti’ le je’elo’oba’: Oaxaca (10.5 por siiento), Kaanpech (10.3 por siiento), Michoacán (10.2 por siiento), Yucatán (10.1 por siiento) yéetel Baja California (9.6 por siiento).
Múuch’kabile’ tu ts’áaj k’ajóoltbile’, ichil péetlu’umo’ob tu’ux ma’ jach ko’ojchaj ba’ale’ ti’ yaan Estado de México (6.7 por siiento), Querétaro (6.9 por siiento), Ciudad de México (7.2 por siiento), Guerrero (7.3 por siiento) yéetel Tabasco (7.3 por siiento).
Ba’ale’, u jaajile’, ichil tuláakal u noj lu’umil Méxicoe’ u tojol u ma’anal u jejeláas janabenba’alo’obe’ “jach píitmáanja’an”, beey chíikpaj te’e xaak’alo’; tumen yaan tu’uxe’ na’ak tak 13.47 por siiento, tak tu yáax kinsee k’iinilo’ob noviembre ti’ u ja’abil 2022.
“Le je’ela’ ku péeksik u yóol máak, tumen ichil lajuntúul mexikoilo’obe’, kantúule’ jach óotsil meyaj yaan ti’”, a’alab tumen México ¿Cómo Vamos?
Je’el bix le ku yúuchul yéetel u waajil ixi’im, tumen te’e ja’aba’, na’ak 16.97 por siiento; u áarinail triigoe’ na’ak 35.37 por siiento te’e ja’aba’; je’e’ na’ak 26.31 por siiento te’e ja’aba’; yéetel leechee’ na’ak 14 por siiento.
Múuch’kabile’ tu ya’alaj janabenba’alo’ob yéetel uk’benba’alo’ob ma’ ti’al káaltale’ tu beetajo’ob u ka’antal 3.6 puntos u ko’ojil ba’al ichil tuláakal le 8.14 por siiento ts’o’ok u yantalo’.
Xak'alutskíinsa'an tumen: Sasil Sánchez Chan
