Tumen máan u k’iinil Día Mundial de la Lucha Contra el Sida, jejeláas múuch’kabilo’ob tu péetlu’umil Yucatán tu líik’sajo’ob jejeláas meyajo’ob tu kaajil Jo’ yéetel Saki’ ti’al u péektsilta’al ich kaaj u k’a’ananil u kaláantikubáaj máak ti’ le k’oja’anilo’.
Meyajo’obe’ yaan u káajalo’ob láas 9 ja’atskab k’iin, yéetel jump’éel u cha’anil toj óolal, tu kúuchil Hospital General de Alta Especialidad; kéen ts’o’okoke’, láas 10e’ yaan ti’ kun beetbil tu kúuchil Centro Ambulatorio para la Prevención y Atención en Sida e Infecciones de Transmisión Sexual (Capacits).
Chúumuk k’iine’, xsikoloogáa Kelly Ramírez yéetel xjestoráa Dafne Aguilar ku meyaj Igualdad Sustantiva Yucatán yaan u beetiko’ob u tse’ekil Avances y Prevención del VIH tu lu’umil Yucatán, yaan u beeta’al tu kúuchil audiovisual Tecnológico de Mérida; yéetel yaan u máansa’al Facebook Live, tu kúuchil SEIMIQ ITMerida.
En español: Día Mundial de la Lucha Contra el Sida: Estas actividades se realizan en Yucatán
Ka’alikil táan tse’eke’, láayli’ te’e Tecnológicoo’ yaan u beeta’al u prueebasil u yila’al wa tsaayal ti’ máak sexual k’oja’anilo’ob, le je’ela’ tu kúuchil audiovisual 2.
Láas 17:45, tu kúuchil palacio municipal ti’ u noj kaajil Jo’e’ yaan u t’a’abal sáasilo’ob yéetel u boonil le k’iina’; ts’o’okole’ te’e K’íiwiko’ yaan xan u ts’a’abal u prueebasil ti’al u yojéeltik máak wa tsaayal ti’ VIH, le je’ela’ yaan u beeta’al tumen u múuch’kabil Fundación BAI ichil 17 tak 20 ooras.
Tu kaajil Saki’e’ yaan xan u beeta’al uláak’ meyajo’obi’. Tukulta’an u káajal láas 6 tu taal u yáak’abtal; le je’ela’ u cha’anil Feria de la Salud Sexual “Indetectable=Intransmisible”, táan u taal u beeta’al tumen u kajnáalilo’ob Saki’, tu kúuchil palacio municipal.
Beyxan, te’e méek’tankaajo’ yaan u ts’a’abal sáasil ti’al u chíikbesa’al u máan le k’iina’.
Láas 7 áak’abe’ yaan u tse’ektal “Indetectable es igual a intransmisible” tumen Dr. Jonathan Geovani Cervera Aké, máax táaka’an ichil Capacits Valladolid. Tsikbale’ ti’ kun beetbil tu kúuchil Salón de los Murales, ti’ le palacio municipalo’.
Beey túuno’, láas 8 áak’abe’ yaan u tse’ektal “Protocolo mosaico” tumen Danny Euán, máax ku meyaj Unidad de Atención Médica e Investigación en Salud (Unamis) ti’ u noj kaajil Jo’. Tu kúuchil Salón de los Murales, ti’ u palaciol Saki’.
Ichil ba’ax a’ala’an tumen sistema de vigilancia epidemiológica de VIH meyajta’an tumen Secretaría de Salud de la federación, en Yucatán yaan u yik’el le k’oja’ana’ ti’ 104 u p’éel méek’tankaajo’ob ti’ le 106 yano’obo’; ba’ale’ tu kaajil Jo’ yaan u ya’abil máax ti’ tsaayal tumen k’ucha’an tak 77.02 por ciento.
Xak'alutskíinsa'an tumen: Sasil Sánchez Chan
