U mola’ayil Cámara Nacional de Comercio, Servicios y Turismo (Canaco Servytur) ti’ u noj kaajil Jo’e’ táan u tukultike’, u k’iimbesajilo’ob diciembree’ je’el u beetik u suut tak maanal 14 mil miyoonesil pesos.
Le beyka’aja’ ku chíikbesik 6 por siientoil maanal ti’ le beyka’aj yanchaj láayli’ te’e jaats k’iino’obo’, ba’ale’ ti’ u ja’abil 2021, beey úuchik u ya’alik Iván Rodríguez Gasque, máax jo’olbesik Canaco. “Jach lep’a’an u yóol ajkoonolo’ob ti’ u lu’umil Yucatán ikil táan u náats’al u k’iimbesajilo’ob diciembre, tumen te’e ja’aba’ yaan u béeytal u beeta’al posadáas, k’iimbesajo’ob, múuch’tambalo’ob, ichil uláak’ ba’alo’ob, le beetike’ yaan u yantal uláak’ bix u suut u taak’in te’e péetlu’uma’”, tu tsikbaltaj.
En español: Fiestas decembrinas dejarían derrama de más de 14 mil mdp: Canaco Servytur Mérida
Ichil ba’ax tu ya’alaj Rodríguez Gasquee’, u winalil diciembree’ jump’éel winal tu’ux asab ya’ab u péek u meyajil koonol, tumen le kéen bo’ota’ak xan ajmeyajo’ob yóok’lal tu taal u ts’o’okol ja’abe’ ku yantal xan taak’in ti’al u béeytal u máan maan máak.
“U kúuchilo’ob koonole’, u kúuchilo’ob janal, wenel, ichil uláak’o’obe’ ts’o’ok u líik’sikubáajo’ob ti’al u ts’aatáanta’al tuláakal ba’ax bíin k’a’abéetchajak ti’ máaxo’ob kun u’ulo’ob; u ya’abil maane’ ku tukulta’ale’ yaan u yúuchul tu yáax kiinse k’iino’ob diciembree’ tumen leti’ kéen bo’ota’ak máaxo’ob yaan formal meyaj ti’ob”, tu ya’alaj.
Beey túuno’, máax jo’olbesik Canaco Mérida tu ya’alaje’, u jach péek ba’al u ti’alo’obe’ ku yúuchul ichil 15 yéetel 24 ti’ diciembre, tumen leti’ kéen jóok’ok máak u man ba’al uj ti’al, beyxan ti’al u yotoch wa ti’al u síiej, je’el bix xan ti’al u yáak’abil Noche Buena.
Le beetike’, táan u tukulta’ale’ te’e k’iino’obo’ yaan u ya’abtal xan máak kun bin te’e plaasaso’obo’ yéetel kúuchilo’ob koonol, tu noj kaajil Jo’.
Rodríguez Gasque tu ya’alaje’ le ba’alo’ob ku asab ma’anal tu winalil diciembree yóok’lal le k’iimbesajo’obo’ ti’ yaan: nook’, xanab, u nu’ukulilo’ob k’óoben, ki’ book ba’al, séelularo’ob, u nu’ukulil u beeta’al peseebrée, mejen sáasilo’ob, pa’a p’úul, ichil uláak’ ba’alo’ob.
Xak'alutskíinsa'an tumen: Sasil Sánchez Chan
