Ya’abach kolnáalo’ob, láak’inta’anob tumen jo’olpóop José Dolores Brito Pech, ti’ u kaajil Hecelchakáne’ kóojo’ob tak noj kaaj ti’al u tak poltiko’obe’, táan u k’a’abéetkunsa’al u yich Guardia Nacional (GN) ti’al u ta’akal k’aak’as múuch’o’ob ku loobilaj. Kajnáalo’obe’ tu ya’alajo’ob jayp’éel k’iino’ob paachile’ tu yóotajo’ob okol tu páarselaob, ba’ale’ ma’ jcha’ab u máano’ob tumen óoxtúul máak u machmaj u ts’oono’ob, ts’o’okole’ tu ya’alajo’obe’ ti’ bin ku meyajo’ob GN, chéen ba’axe’ ma’ tu ye’eso’ob mix jump’éel ju’un a’alik wa jaaj ba’ax ku ya’aliko’ob.
Kolnáalo’obe’ tu tsikbalto’obe’ mina’an mix ba’al a’alik wa k’a’abéet u yantal le máako’ob te’elo’, ts’o’okole’ ma’ xan tu ye’eso’ob mix jump’éel ju’un tu’ux ka a’alake’, najmal u kaláanta’al le k’áaxo’, “yáaxe’ mix tu páajtal u yokolo’ob te’elo’ tumen éejido’ob, ts’o’okole’ chéen to’on ku páajtal kbeetik wa ba’ax te’e k’áaxo’, le beetike’ je’ela’an k-ilik ka yanak máaki’, ts’o’okole’ sajbe’entsil, tumen leti’obe’ tu ya’alajo’ob ti’ ku meyajo’ob Guardia Nacional, ba’ale’ mina’an mix u nook’il ti’ob, mix xan u ju’unil u ye’esiko’ob”, tu jets’ajo’ob.
En español: Denuncian posible presencia del crimen organizado en Hecelchakán
Uláak’ ba’ax tu tak poltajo’obe’, u Vicefiscalíail Hecelchakáne’ ma’ tu yu’ubaj u t’aano’obi’, ma’ chíimpolta’ab u tak poolo’obi’, le beetike’ k’ucho’ob tak Palacio de Gobierno, tumen bin u ts’áajo’ob tka pool tu táan Fiscalía General del Estado de Campeche (Fgecam), ba’ale’ a’alab ti’obe’ unaj ka’ach u beetiko’ob tu táan u mola’ayil u kaajalo’ob, Hecelchakán, ti’al beyo’, kéen ts’o’okoke’ u k’áata’al ka táakpajak túun le Fiscalíao’ ti’al u beeta’al meyajo’ob k’a’abéet ti’al u sáasilkúunsa’al ba’ax k’a’abéet.
P’el úuchik u yóotik u beetiko’ob tak pool te’e noj kaajo’, bino’ob tu joolnajil Palacio ti’al u líik’sik u t’aano’ob yóok’lal tuláakal máan k’a’abéet u beeta’al ti’al u beeta’al justiisya, yéetel ti’al u k’áatiko’ob ti’ u jala’achil u noj lu’umil Kaanpeche’ ka ts’a’abak u yuumil kaláantik k’áaxo’ob tumen leti’obe’ saajko’ob u yokol u k’aak’as múuch’o’ob te’elo’, tumen ma’ u k’áato’ob ka yanak mix jump’éel talamil; máax ku yokol te’elo’ unaj u sáasilkúunsik máaxi’, tumen wa jaaj táaka’ano’ob ich Guardia Nacionale’ unaj u béeytal u ye’esiko’ob, ba’ale’ leti’obe’ ma’ tu betajo’obi’, ts’o’okole’ chéen je’el ba’axak nook’il u búukintmajo’ob.
Jo’olpóope’ tu cha’aj u t’aan kolnáalo’ob, yéetel tu ya’alaje’ ts’o’okili’ u yáax bino’ob tu táan Policía Municipal, ba’ale’ máako’ob yano’ob ka’ach te’e páarselaobo’ luk’o’ob aantes u k’uchul le ajkanan kaajo’obo’.
Xak'alutskíinsa'an tumen: Sasil Sánchez Chan
