Najilo’ob xook, Universidad Intercultural, jump’éel nu’ukbesajil kaambal táan u betea’al tumen U Jala’achil u noj lu’umil México, ts’o’okole’ ma’ ko’oji’ tumen beyo’, le máax kéen u k’áax xook yéetel mina’an u taak’inile’ yaan u béeytal u bin kaambali’, le beetike’ yaan u je’ebel ka’ap’éel, jump’éele’ tu kaajil Dzitbalché kun yantal, yéetel uláak’ jump’éele’ Palizada. Le u ts’ooka’ u ti’al xan u béeytal u k’uchul tak táankelemo’ob ti’ u péetlu’umil Tabasco, beey úuchik u ya’alal tumen u jo’olpóopil le ka’ap’éel kaajo’obo’, Roberto Herrera Maas yéetel Angela Cámara Damas.
En español: Dzitbalché y Palizada beneficiados con Universidad Intercultural
Herrera Masse’ tu tsikbaltaj tu kaajil Dzitbalché ts’o’ok u káajal u líik’sa’al u kúuchil, yéetel ti’ le winalo’ob ku taala’ leti’ kéen jach k’a’aytak uláak’ ba’alo’ob yóok’lal; tak walkila’ u kúuchile ts’o’ok u ts’a’abal, yéetel táan u beeta’al ka’ansajil máax ku meyaji’, beyxan táan u yéeya’al u ajka’ansajilo’obi’. Ti’al u beeta’al le u ts’ook ba’ala’ u jala’achil péetlu’um kun jets’ik, ba’ale’ ti’al u kóontratose’ u jala’achil u lu’umil México kun t’sáak.
Ti’al u kaajil Palizadae’, Cámara Damase’ tu ya’alaje’ ti’ kun ts’a’abil tu chan kaajil Juncal; yaan u beeta’al u kúuchil yéetel u Ayuntamientoil Palizadae’ yaan u ts’áak uláak’ jump’éel kúuchil ti’al u béeytal u k’uchul wenel máaxo’ob ku taal ti’ náach mejen kaajo’ob, wa ti’ uláak’ méek’tankaajo’ob, tumen le je’ela’, tukulta’an ti’al u béeytal u kóojol uláak’ táanxel kajilo’ob.
U Ayuntamientoil le kaajo’oba’ yaan u múul meyajo’ob yéetel uláak’ u jaatsilo’ob jala’ach, ti’al u chúukpajal u taak’inil u beeta’al, yéetel táan u páa’ta’ale’ ma’ u tse’elel wa u luk’sa’al taak’in jóok’sa’an u ti’al.
Najil xook kun ts’a’abail Palizadae’ yaan ka’ap’éel káarera tukulta’an u beeta’al: íinjenieria en Ganadería yéetel Turismo.
Xak'alutskíinsa'an tumen: Sasil Sánchez Chan
