Walkila’, ts’o’ok u patjo’olta’al bix kéen jeel tsola’ak bix yanik u jáal jailo’ob Parque Nacional Tulum (PNT); ichil k’a’anan k’eexilo’ob kun beetbile’ ti’ yaan u je’ebel uláak’ óoxp’éel tu’ux u yokol máak tak te’elo’, u jeel ts’a’abal u kúuchil 170 u p’éel ajmeyajo’ob, u túumbenkúunsa’al kúuchilo’ob, u k’e’exel bix u máan máaki’ yéetel u je’elsa’al ba’ax ma’ no’oja’an u meyaji’. U ti’al u béeytal meyajo’obe’ yaan u k’a’abéetkunsa’al kex 43.3 miyoonesil pesos, beey jts’a’ab k’ajóoltbil tumen Román Meyer Falcón, máax jo’olbesik Secretaría de Desarrollo Agrario, Territorial y Urbano (Sedatu).
Ichil tsikbal tu beetaj úuchik u xíimbaltik Tulum le jueves máana’, ti’al u xíimbaltik meyajo’ob k’ubéenta’an ti’e’, jmeyaje’ tu ya’alaje’, jump’éel ti’ le nojoch talamilo’ob ku yilik yaane’ leti’ u seen beeta’al kúuchilo’ob kex ma’ cha’abani’ ichil le k’áax kaláanta’ano’.
Tu tsibaltaj xane’, táan u kaxta’al ka yanak múul meyaj yéetel Comisión Nacional de Áreas Naturales Protegidas (Conanp) ti’al “u je’elsa’al jumpul” ba’ax ma’ patal u beeta’ali’.
En español: Abrirán tres accesos más a las playas del Parque Nacional Tulum
Tu ya’alaje’, tumen jala’ach Andrés Manuel López Obrador beey tu k’áatajo’, najmal iu je’elsa’al kúuchilo’ob táan u líik’sa’al walkila’, je’el bix le yano’ob Playa Santa Fe.
Meyaj beeta’ab ti’al u no’ojankúunsa’an le tu’ux ku yokol máak te’e jáal ja’o’ tu táakbesaj u beeta’al baanyos, u kúuchilo’ob janal, u kúcuhil u ko’onol kookóo, ichil uláak’o’ob; yéetel le je’ela’ táan u kaxta’al u tsola’al ba’ax yaan te’elo’.
Beey túuno’, tu ya’alaj xane’, ti’al xan u ts’aatáanta’al u kuxtalil k’áaxe’, yaan u yila’al ka ts’a’abak u kúuchil u ye’el áako’ob kéen k’uchuk u k’iinil u beetik u k’u’.
Román Meyere’ tu tsikbaltaje’ tu yáax jaatsil meyaje’, táakbesa’ab 21 kiloometróos, yéetel beeta’ab u beel u máan máak ti’ biikláa tu noj bejil Cobá, tu’ux k’a’abéetkunsa’ab óoli’ 96 miyoonesil pesos. Ti’al meyajo’ob kun beetbil naats’ ti’ le jáal ja’o’ yaan u káajsa’al tu káajbal u ja’abil 2023 yéetel tukuklta’an u ts’o’oksa’al kéen taalak u ts’o’okol xan.
Xak'alutskíinsa'an tumen: Sasil Sánchez Chan
