Kex tumen síij tu lu’umil Kaanpeche’, Efraín Calderón Lara El Charras, asab k’ajóolta’ab Yucatán yéetel Quintana Roo, le beetike’, tumen táan u náats’al u k’a’ajsajil 50 ja’abo’ob kíinsa’ake’, u múuch’kabil Frente de Trabajadores Democrático de Campeche, tu ya’alaje’ yaan u beetik xíimbal meyaj ti’al u ts’áak k’ajóoltbil ba’ax meyajil tu beetaj El Charras k’iin kuxlaji. Ichil túun le meyajo’obo’ ti’ yaan ka xo’okok u áanalte’il Movimiento popular 1973-1974 en Yucatán, tu’ux ku tsikbalta’al ba’ax seen úuch tu kuxtal Calderón Lara.
Ti’ Pedro Quijano Uc yéetel Fernando Cabrera Castillo k’ubéenta’ab ka u ts’áajo’ob k’ajóoltbil tu’ux ku máano’ob xíimbal: Felipe Carrillo Puerto, tu lu’umil Quintana Roo, tak Kaanpech, ba’ale’ ma’ u yojelo’ob jach beyka’aj kun xáantal xíimbal meyaj ku beetiko’oba’.
En español: Inicia gira el Frente de Trabajadores Democrático de Campeche para dar a conocer al 'Charras'
Te’e áanalte’ ku péektsilta’alo’, ku xoka’al bix úuchik u péek politikáa tu lu’umil Yucatán. Ts’íibo’obe’ beeta’ab tumen ajts’íib k’ajla’ayil yéetel áaktibistaob jejeláas ba’ax tu beeto’ob ti’al u péeksa’al u yóol kaaj yéetel ajmeyajo’ob, táakmuk’ta’an walkila’ tumen Frente de Trabajadores de Campeche, ts’o’okole’ yaan u ja’ajatso’ob ti’ uláak’ u péetlu’umilo’ob le petena’.
Ba’ale’ u k’aaba’ Charrase’ asab k’ajóolta’an tu lu’umil Yucatán, yaan u muuk’ yéetel chíikpaj ba’ax tu beetaj yóok’al ajmeyajo’ob; ka’alikil Kaanpech, tu’ux síij tu méek’tankaajil Hopelchene’, yéetel Quintana Rooe’ ma’ jach ojéela’an máaxi’ mix xan wa ba’ax béeykunsa’al walkila’, péektsilta’ab tumen Calderón Lara.
Beey túuno’, Pedro Quijano Uc yéetel Fernando Cabrerae’ tu ya’alajo’obe’ ya’abach ti’ le utsil ba’alo’ob ku yantal ti’ múuch’kabilo’ob walkila’, jch’a’ab ti’ ba’ax yáax meyajta’ab tumen le bolonp’éel múuch’kabilo’ob jóok’ tu k’iinil kuxa’an El Charras, tumen ma’ kunen úuchik u kíimili’, tumen yanchaj máax ch’a’ajoltik ba’atel tu káajsaj ti’al u táakmuk’ta’al u páajtalil ajmeyajo’ob yaan tu péetlu’umil Yucatán.
Xak'alutskíinsa'an tumen: Sasil Sánchez Chan
