U jala’achil u noj lu’umil Estados Unidose’ tu k’a’aytaj le lunes máanika’, kajnáalo’obe’ sajbe’entsil yaniko’ob yóok’lal le jejeláas xwo’okino’ob táan u yantal te’e ts’ook k’iino’oba’ ichil taxistaob yéetel máaxo’ob k’a’abéetkunsik Uber, tu’ux ila’ane’ yaan ajxíinixmbalo’ob táaka’ani’.
“Yóok’lal le ts’ook ba’alo’ob ucha’an, tu’ux táakpaj taxistas yéetel máaxo’ob ku meyaj Uber tu péetlu’umil Quintana Roo, ku k’a’ajsa’al ti’ estadunidenseilo’obe’ yaan áantaj ku ts’a’abal tumen Travel.State.gov, le je’ela’ u ti’al u nu’uktal bix unaj u k’a’abéetkunsa’al u jejeláasil meyajo’ob tráasnportée yaan te’e lu’umo’, je’el bix jets’a’an u meyaj tu lu’umil México”, ku béeytal u xo’okol ti’ k’a’aytajil ts’íib yaan tu paajinail https://mx.usembassy.gov/security-alert-quintana-roo/.
Beey túuno’, ku k’a’ajsa’al ti’ estadunidenseilo’obe’ kex tumen yaan áaplikasyonesil je’el bix Uber yéetel Cabify ts’a’aban ti’al u k’a’abéetkunsa’al ti’ jejeláas u kaajilo’ob Méxicoe’, yéetel suuka’ane’ uts ti’al u meyaj ti’ kaaj tumen ma’ sajbe’entsil ti’ kaaji’, walkila’ táan k-ilike’ yaan kaajo’ob je’el bix ti’ Cancúne’ tu’ux ma’ beey yúuchul ba’ali’.
En español: Emite EU alerta de seguridad por conflicto de taxistas vs Uber en Cancún
“Ts’o’ok u yantal máaxo’ob beetik tak pool yóok’ol Uber yéetel uláak’ máako’ob ku meyajo’ob ti’ taxis, tumen yanili’ xwo’okin ba’al ichil máaxo’ob ku meyajtiko’ob le ba’alo’ob beey te’e kaajo’, le beetike’ yaan k’iine’ ku yantal tak loobilajil, ts’o’okole’ le je’elo’ ku chíibesik xan loobilaj ku yantal yóok’ol estadunidenseilo’ob”, a’alab ti’ sajbe’entsil jóok’sa’ab le 23 ti’ eneroa’.
U jala’achil u noj lu’umil Estados Unidose’ tu páayt’antaj u yéet kaajilo’obe’ ka u xak’alto’ob mantats’ u ts’íibil Avisos de Viaje para México (https://usdos.sharepoint.com/sites/knowledgeportal/pages/home.aspx), ti’al u yila’al ba’ax jets’a’an ti’al u kaláanta’al máak, beyxan ti’al u kanik u yil máak bix unaj yanik ba’ax bak’pachtik máak yéetel ma’ u p’áat sajbe’entsil mix tu’ux ka máanaki’; ku ya’alal xane’ ka’a’béet u t’aan máak ti’ 911 wa ku k’a’abéetchajal u xchukul áanta’al máak.
“Yóok’lal ba’ax ts’o’ok u yúuchul te’e ts’o’ok k’iino’oba’, k’a’abéet u k’a’ajsik máake’ je’el tu’uxak ka xi’ik máak xíinximbale’ yaan xan u sajbe’entsil. Xwo’okino’ob, u kíinsa’al máak, u yokolta’al máak, ichil uláak’ ba’alo’obe’, jach suuka’an u yila’al tu lu’umil México”, ku xo’okol ti’ estadunidenseil ts’íib.
Xak'alutskíinsa'an tumen: Sasil Sánchez Chan
