Ikil táan u béeytal u yantal múul meyaj ichil u mola’ayil Secretaría de Relaciones Exteriores yéetel Instituto Nacional de Migración, yaan u kóojolo’ob tak tu mola’ayil Sisal Tejidos Yucatán ti’al u taasa’al tak te’elo’, jaytúul máako’ob ti’ u lu’umil INdia, ti’al u ka’ansa’al ti’ yukatekoil ajmeyajo’obe’, uláak’ bix je’el u páajtal u beeta’al meyajo’ob ti’al u jóok’ol ba’al tu beel, yéetel ti’al u nonojchajal le ba’ax ku meyajta’alo’.
Asiátikoil máako’ob kun taalo’obe’ ti’ ku meyajo’ob tu mola’ayil Yamuna Machine Works LTD, yéetel ba’ax ku kata’ale’ leti’ u yantal u jeel ba’alo’ob kanbil, je’el bix u k’a’abéetkunsa’al u oornoil laatex, tumen le je’elo’ jump’éel ba’al uts u ts’a’abal ichil u póopil sóoskil ku beeta’al ti’al u túuxtal konbil ti’ uláak’ lu’umo’ob.
Ichil xíimbal meyaj beeta’ab ti’ jump’éel plaanta yaan tu kaajil Muxupip, tu yookbal MOtule’, máaxo’ob jo’olbesik Oficina de Pasaportes, ichil u mola’ayil SRE ti’ u lu’umil Yucatán, Maestra Mariana Cruz Pool, beyxan máax jo’olbesik Instituto Nacional de Migración, Yadira de los Santos Robledo, tu k’ajóoltajo’ob bix yanik le kúuchuilo’, ts’o’okole’ béeychaj u much’ikubáajo’ob yéetel máaxo’obx an jo’olbesik Sisal Tejidos, ti’al u béeytal u je’ets’el bix kun beetbil le múul meyajo’ kéen k’uchik inidia máako’ob tak te’e lu’umo’.
En español: Expertos de la India capacitarán a trabajadores de Sisal Tejidos Yucatán
Beey túuno’, ichil ba’ax tsola’ab tumen máaxo’ob jo’olbesik mola’ayobe’, yéetel meyaj ku beetbile’, yaan u áautomatisaartik u ts’áak u laatxil k’a’abéet ti’ le póopo’ ti’al ma’ u oykol úumedad ti’, beyxan ku mu’uk’ankúunsik ti’al ma’ u séeb k’astal yéetel ma’ tu jilk’ajal, le beetike’ ku asab ma’alobkúusna’al bix u beeta’al le nu’ukula’, je’el ku k’a’ata’al tumen máaxo’ob manik.
Beyxan yaan u ye’esa’al ti’ob bix u k’a’abéetkunsa’al u oornoil laatex, yéetel bix unaj u ts’a’abal poliimeróo. Le je’ela’ yaan u beeta’al tumen Yamuna Machine Works LTD, jump’éel mola’ay ts’o’ok 25 ja’abo’ob káajak u meyajtik le nu’ukulo’oba’, yéetel ti’ ku meyaj tu kaajil Vapi. Leti’obe’ yaan xan u ye’esik ti’ u ajmeyajilo’ob Yucatáne’, uláak’ bix je’el u jit’a’al le póopo’obo’ yéetel uláak’ diseenyos je’el u béeytal u beeta’al yéetel sóoskil.
Tu winalil junio ti’ u ja’abil 2022, leti’ kéen káajak u meyaj u mola’ayil Sisal Tejidos Yucatán, u yáax plaantail je’el bix le je’ela’ kun yantal ichil América Latina yéetel u wukp’éelil yaan ichil tuláakal yóok’ol kaab.
Xak'alutskíinsa'an tumen: Sasil Sánchez Chan
