Ko’olelo’obe’ kóojo’ob tu paarkeil El Crucero, yaan tu kaajil Cancún, ti’al u ye’esik ba’ax ku koniko’ob, ti’al beyo’ u yantal u náajal taak’ino’ob, je’el bix xan ti’al u mu’uk’ankúunsa’al meyajo’ob ku beeta’al ti’al u yantal meyaj xma’ sajbe’entsil ti’al mix máak. Le je’ela’ táan u taal u beeta’al ichil u meyajilo’ob ti’ u cha’anil Feria Manos Emprendedoras, beeta’an tumen u jala’achil le péetlu’umo’.
“Ti’ meyajo’ob beya’ ku ts’a’abal u kúuchil ti’al u ye’esik ko’olel ba’ax ku meyajtik, beyxan k ts’áak u páajtalil u ka’anal uláak’ ba’alo’ob, yéetel k-e’esik ti’ob ba’ax bejil k’a’abéet u ch’a’ako’ob ti’al u ts’áakubáaj de aaltáa, u kaniko’ob bix u meyajta’al taak’in yéetel walkila’ táan kts’áak u kaambalil e-commerce, ti’al u béeytal u kona’al ba’al ti’ Internet”, beey tu tsikbaltaj Landy Ortega Ceballos, máax jo’olbesik Empoderamiento y Desarrollo Sustentable ti’ u mola’ayil Instituto Quintanarroense de la Mujer.
En español: Emprendedoras ofertan sus productos en el parque El Crucero, en Cancún
Le cha’anila’ yaan u beeta’al ti’ tuláakal u méek’tankaajilo’ob Quintana Roo, ti’al u k’a’aytal ba’ax ku meyajta’al tumen ko’olel, tumen beyo’ je’el u yantal u náajalo’ob, ts’o’okole’ jump’éel bix je’el u yéensa’al le beyka’aj loobilaj ku beeta’al yóok’ol. Te’e cha’anila’ táakpaj 50 u túul xmeyjul ko’olel.
Ti’al le cha’ana’ ku kaxta’al kúuchilo’ob tu’ux chochobkil u máan máak, le beetik le je’ela’ ti’ jbeeta’ab tu kúuchil El Crucero, ti’al u yila’al ma’ sajbe’entsil ti’al mix máaki’, tumen beyo’ jujump’íitil kun káajal u bin máak ti’al u náaysik u yóol.
Landy Ortega tu ts’áaj k’ajóoltbile’, chéen tu kaajil Othón P. Blanco ts’o’ok u yantal 800 u túul ko’olel ts’o’ok u táakpajal te’e meyaja’, yéetel tu méek’tankaajil Benito Juáreze’ táan u bin u ya’abta’al, ba’ale’ ma’ ojéela’an jach jaytúuli’ tumen táan u ts’o’okol u xo’okol.
Leti’ xane’ tu páayt’antaj ko’olel ti’al ka táakpajak ti’ kaambal ku beeta’al. Tuláakal u k’a’aytajilo’ob yóok’lal le meyajo’obo’ ti’ ku k’a’aytal tu kúuchil Facebook: IQM Instituto Quintanarroense de la Mujer.
Xak'alutskíinsa'an tumen: Sasil Sánchez Chan
