Nu’ukbesaj ku taal u beeta’al ti’al u k’a’aytal ba’ax meyajilo’ob táan u kaxta’al u yuumile’, táan u kaxtik ka yanak meyaj ti’ máax k’a’abéet ti’ ichil u kajnáalilo’ob Benito Juárez. Le beetike’ lalaj miércoles ku xíimbalta’al jump’éel múuch’kajtalil ti’ le baantailo’, tu’ux ku ye’esa’al kex tumen 50 u p’éel mola’ayo’obe’ ba’ax meyajilo’ob yaan ti’ob ti’al kaaj.
Enrique Morales, máax jo’olbesik Dirección General de Desarrollo Económico ichil u áayuntamientoil Benito Juáreze’, tu k’a’aytaje’ ichil le xíimbal k’a’aytajil beeta’ab le p’is k’iinil máaniko’, yanchaj tres mil 324 u túul u yuumil meyaj ku kaxta’al ichil tuláakal u jaatsil le mola’ayo’obo’, ts’o’okole’ le je’elo’ táan u bin u ya’abtal tumen táan xan u yantal túumben mola’ayob.
“Nu’ukbesaje’ táan kbeetik lalaj miércoles, láas 9 ja’atskab k’iin tak láas 2 u taal u chíinil k’iin. Tuláakal miércolese’ ku k’a’ayta’al tumen jejeláas mola’ayo’obe’, ba’ax seen meyajo’ob mina’an u yuumil; u ya’abile’ leti’e’ otelo’obo’, beyxan nukuch kúuchilo’ob koonol… leti’e’ mola’ayob meyajtik turiismóo táan u kaxtiko’ob ajmeyajo’ob”, tu ya’alaj Enrique Morales. Nu’ukbesaj ku beeta’al te’e semaanáa’ beeta’ab ti’ doomo yaan tu baantail Región 247, ba’ale’ ti’al u yojéelta’al tu’ux kun máan k’a’aytbil le meyajo’obo’, ku páajtal u xak’alta’al u perfilesil Ayuntamiento de Benito Juárezti’ u kúuchil Facebook (@AYTOCANCUN), Twitter (@AytoCancun) yéetel Instagram (@aytocancun).
En español: Harán ferias del empleo itinerantes cada semana en Cancún
Beyxan uláak’ tu’ux ku kaxta’al ajmeyajo’obe’ leti’e’ tu’ux yaan ba’al u yil yéetel tráansportée, beyxan jbeet janal, stewards, meeseróos, kanan najo’ob, ichil uláak’o’ob.
“Tak tu ja’abil 2022e’, táan u máan kaxtbil ichil dos mil, tak dos mil 500 u túul ajmeyajo’ob, ba’ale’ te’e ts’ook k’iino’oba’, maanal tres mil ku kaxa’atili’. Le je’ela’ tumen táan u je’ebel túumben mola’ayo’ob yéetel k’a’abéet u yuumil máax meyajtik”, tu ya’alaj.
P’áat xan mina’an ajmeyajo’obi’ úuchik u yantal u pak’be’en k’oja’anil Covid-19, tumen kex ya’abchaj máax p’áat mina’an meyaj ti’e’, úuchik u k’uchul 3 por siientoil tak 10 por siientoil , ka’aj káaj u ch’a’ajolta’al u je’ebel mola’ayo’obe’, ya’abach máake’ ts’o’okili’ u kaxtik ba’al u beeej, le beetik ma’ ya’abach máak suunaj meyaji’.
Ichil tuláakal u ja’abil 2022, mola’aye’ tu beteaj 40 u p’éel le k’a’atajilo’ob meyaja’, yéetel u tuukulile’, ti’al le 2023 yaniko’ona’, ka béeyak u beeta’al 46 u p’éelal.
Xak'alutskíinsa'an tumen: Sasil Sánchez Chan
