U kóonsejereolio’ob táaka’ano’ob tu mola’ayil Instituto Nacional Electoral (INE), tu jets’ajo’ob ka chíimpolta’ak máaxo’ob ku ya’aliko’ob no binaryo’obe’, ti’al ka béeychajak u ts’áako’ob “x” te’e tu’ux ku k’áatik ka u ts’áaj máax u jeenereoil. Ba’ale’ le je’ela’ chéen yaan u béeytal u beeta’al tumen máax bíin u k’áat tu súutukil kéen u jóok’s u kréedensyal, ts’o’okole’ ma’ táan u k’a’abéetchajal u táakmuk’tiko’ob ba’ax kéen u ya’alo’ob yéetel aaktáa de náasimientóo.
Ciro Murayama, juntúul kóonsejeroe’, tu ya’alaje’ ma’ táan u k’áata’al uláak’ wa ba’ax ka u táakumuk’t ba’ax kéen u ya’al máak, tumen le je’elo’ chéen leti’ jets’ik bixij.
En español: INE aprueba el reconocimiento de las personas no binarias en credencial para votar
Beey túuno’, máaxo’ob jets’ik leti’e’ jeeneróo yaan ti’obo’ -máax ma’ tu yu’ubik mix ko’oleli’, mix xiibi’- yaan u béeytal u ts’áako’ob tu kréedensyalil INE, tumen yaan u béeytal u ts’a’abal “x” tu’ux ku ya’alik le k’aaba’o’, wa ma’e’ ku béeytal xan u p’atiko’ob chéen beyo’, ma’ tsaj u ts’a’abal mix ba’ali’.
“A wojel wáaj… tu mola’ayil @INEMexico k-éejentik u táakbesa’al yéetel u ch’íibesa’al “x” te’e tu’ux ku k’áata’al máakalmáak u seexoil máak #CPV ti’al u ye’esa’al #noBinaria máak, ts’o’okole’ mix táan u yantal u táakmuk’tik ba’ax ku ya’aliko’ob yéetel #ActaDeNacimiento. Uláak’ ba’ax ku páajtal u beeta’ale’, leti’ u ya’alal ma’ tsaj u chíikbesa’al mix ba’al te’e tu’ux ku k’áatik ka a’alak máakalmáak u sexoil máak”, k’a’ayta’ab ti’ Twitter tumen xkóonsejeráa Dania Ravel.
Xak'alutskíinsa'an tumen: Sasil Sánchez Chan
