Máaxo’ob ku meyajo’ob ti’ mola’ay kaláantik kaaj tu péetlu’umil Oaxacae’ tu machajo’ob Lorena Merino, yéetel uláak’ jump’éel múuch’il máak táan ka’ach u líik’siko’ob t’aan tu táanakbil u kúuchil Palacio de Gobierno.
Yáax xaak’alo’ob ti’ ba’ax j-úuch’e ku ya’alike’, ko’olele’ máax k’ajóolta’al beey juntúul u xjo’olbesjil triqui péeksajile’- ma’ bin tu yóotaj tsikbal yéetel u jo’olpóopilo’ob le péetlu’umo’, le beetik túune’, le martes máanika’ luk’sa’ab te’e tu’ux yaan ka’acho’.
En español: Detienen a Lorena Merino, líder triqui en Oaxaca
Ajts’íib péektsilo’ob ti’ u péetlu’umil Oaxacae’ tu táabsajo’ob le súutuk úuchik u ma’acha’al ko’olel, máasewal ch’i’ibale’, yéetel le uláak’ máako’ob táan ka’ach u láak’intiko’obe’, luk’sa’abo’ob te’e kúuchilo’ ba’ale’ ti’al u beeta’ale’ k’a’abéetkunsa’ab ya’abach muuk’i’.
Yóok’lal túun le ba’ax úucha’, u múuch’kabil Triquis Copala Oaxaca tu ts’áaj k’ajóoltbile’, le máaxo’ob bin macha’abe’ leti’ le je’elo’oba’: Lorena Merino, Basilio Ramírez yéetel Agustín Ramírez.
Tak walkila’ ma’ xan ts’a’abak k’ajóoltbil mix jump’éel óofisyal ts’íib wa t’aan yóok’lal ba’ax úuchij.
Xak'alutskíinsa'an tumen: Sasil Sánchez Chan
