Úuchik u beeta’al tak pool tumen u éejidatarioilo’ob 5 de Febrero, tu’ux tu ya’alo’ob táan u k’askúunta’al k’áax tu kaajil Champotóne’, u jo’olpóopilo’ob le lu’umo’ tu jets’ajo’ob u beeta’al xaak’al yéetel u xíimbalta’al le k’áaxo’obo’ ti’al u yila’al ba’ax le táan u yúuchulo’, tumen ku ya’alale’ u kajnáalo’ob Laguna Grande beetik le k’aasilo’. Le talamila’ úuch káajak u yúuchul, ts’o’okole’ ti’ 22 mil ektareas yane’, ts’o’ok u k’askúunta’al kex 8 mili’.
Líik’saj t’aan beeta’ab tumen éejidatario’ob ti’al u kajbáal le p’isk’iina’, tu beetaj u yantal u táakpajal jala’acho’ob ti’ le ba’ax ku yúuchula’, tumen ichil u ja’abil 2022e’ kex jo’otéen tu beetajo’ob u tak poolil táan u ch’a’akal che’ob kex ma’ unaji’, ts’o’okole’ k’áax tu’ux táan u beeta’ale’, táakbesa’an ichil u nu’ukbesajil Sembrando Vida, yéetel le ku béeytal u maniko’ob jejeláas ba’alo’ob ti’al u meyajto’ob, ts’a’aban tumen Comisión Nacional Forestal (Conafor).
En español: Campeche: Autoridades realizarán inspección en ejido 5 de Febrero por denuncia de tala ilegal
Máax beetik u súubsekretarioil Gobernación, Hugo Mauricio Calderón, leti’e’ máax u’uy u t’aan éejidatari’ob le lunes máanika’, ba’ale’ leti’obe’ tu ya’alajo’obe’ jach ma’ tu péek u yóol yóok’lal ba’ax ku yúuchul, tumen tu ya’alaj bin ti’obe’, ka’ache’ mix ba’al bin ku ya’aliko’ob yóok’lal yéetel ts’o’ok bin
jump’éel ja’ab káajak u beetiko’ob u tak poolil le je’ela’.
Le fin de semaanáa ku taala’, táan u páa’ta’al u yantal kex ka’ap’éel u k’is buuts’ilo’ob
Secretaría de Marina; ka’ap’éel u ti’al Secretaría de Defensa Nacional; ka’ap’éel ti’al Guardia Nacional yéetel uláak’ jayp’éel ti’al Secretaría de Protección y Seguridad Ciudadana, je’el bix xan ti’al Fiscalía General del Estado de Campeche yéetel u mola’ayil Secretaría del Medio Ambiente, Biodiversidad, Cambio Climático y Energía.
Kéen ts’o’kok u beeta’al le xaak’ala’, éejidatari’obe’ tu k’áatajo’ob ti’ u séekretaryoil Gobierno, Aníbal Ostoa Ortega, ka beeta’ak ba’ax a’alab ti’ob, ti’al u ya’abkunsa’al kanan ku beeta’al te’elo’, tumen wa ka k’uchuk bin tuka’atéen éejidatari’obe’, ma’ tun jach kóojolo’ob yéetel jets’ óolali’, tu ya’alajo’ob.
Xak'alutskíinsa'an tumen: Sasil Sánchez Chan
