U páayt’aanil ti’al u ts’íibta’al u k’aaba’ kaajo’ob ku tukulta’al ku béeytal u chíimpolta’alo’ob beey Pueblos Mágicose’ ts’o’ok u je’ebel, le beetike’, u jo’olpóopil u kaajil Hopelchén, Emilio Lara Calderón, tu ya’alaje’ ts’o’ok u yoksa’al u k’aaba’ u noj kaajil Hopelchén, yéetel Dzibalchén ti’al u yila’al wa no’oja’ano’ob ti’al u k’aaba’inta’al Pueblo Mágico, ti’ u péetlu’umil Kaanpech.
Ichil ba’ax a’ala’an tumen u mola’ayil Secretaría de Turismo Federal, ti’al u chíimpolta’al jump’éel kaaj beey Pueblo Mágicoe’, k’a’abéet “yaan k’a’anan chíikulal, k’ajla’ayil, tsikbalo’ob, kuxtal, jats’uts ba’al, yéetel uláak’ ba’alo’ob ka chíikpajak tu kaajil yéetel ti’ u miatsil”.
Beey túuno’, tu kaajil Hopelchéne’ jach chíika’an maaya kaaj, ts’o’okole’ ku yúuchul paak’áal xani’, láayli’ u beeta’al u cha’anil, yéetel yaan uláak’ ba’al ku ch’a’anukta’al ti’ le kaajo’.
Máax jo’olbesik Secretaría de Turismo de Campeche, Mauricio Arceo Piña, tu ya’alaje’, te’e péetlu’umo’ unaj yaan kex waxakp’éel kaajo’ob chíimpolta’an beey Pueblo Mágico. Walkila’ Palizada yéetel Isla Aguadae’ ts’o’ok u k’amiko’oble k’aaba’o’.
Beey túuno’, Arceo Piñae’ tu páayt’antaj le uláak’ jo’olpóopo’obo’ ti’al u táakbesa’al uláak’ u k’aaba’ kaajo’ob ba’ale’ yáax táanile’ ka u ch’a’ob u t’aanil u yantal u kaláantiko’ob u kaajilo’ob yéetel u ts’aatáantiko’ob ba’ax k’a’abéet ti’al u béeytal u chíimpolta’al beey Pueblo Mágico, tumen kéen beeta’ake’ ku mu’uk’anchajal xan taak’in ku yokol te’e kaajo’obo’.
Tu ts’ooke’, Lara Calderóne’ tu ya’alaj ma’ táan u jach t’aan yóok’lal le ba’ax ku tukulta’ala’ tak kéen je’ets’ek u chíimpolta’al le kaajo’oba’ tu táan u mola’ayil Secretaría de Turismo Federal.
Lee: Hopelchén y Dzibalchén, propuestas para ser Pueblos Mágicos
