Oscar Rosado Jiménez, máax jo’olbesik tu noj lu’umil México Comisión Nacional para la Protección y Defensa de los Usuarios de Servicios Financieros (Condusef), tu ya’alaje’ u 60 por siientoil tak pool beeta’ab te’e mola’ayo’ yaan ba’al u yil yéetel u seen t’a’anal máak tumen baakóo, tu paache’ ti’ yaan le beeta’ab tumen áaseguradoráas yéetel aforées.
U 95 por siientoil tak poole’ beeta’ab yóok’ol u baankosil: Banamex. BBVA, Banco Azteca, Banorte, Santander yéetel HSBC. U 40 por siientoil ti’ le tak poolo’obo’ yanchaj ba’al u yil yéetel ookol tu k’aaba’ baankóos.
Ichil xíimbal meyaj tu beetaj tu kaajil Jo’e’, meyajnáale’ tu ya’alaje’, tak poolo’obe’ beeta’ab ti’ ba’al yaan ba’al u yil yéetel u táarjetasil kreeditóo, debitóo, beyxan tumen yaan bo’olo’ob ma’ máak beeti’, yéetel ookol.
En español: Condusef ofrece opciones para combatir el ''estrés financiero''
Yóok’lal túun ookol tu k’aaba’ baankose’, tu ya’alaje’ “jach k’aas ba’ale’ ts’o’ok u ya’abtal ookol, ts’o’okole’ jach ma’alobkúunsa’an bix u beeta’al, ts’o’ok u talamtal ba’al yóok’lal”. Le ja’ab máaniko’, tu k’amajo’ob 60 mil tak pool yóok’lal le je’ela’, ichil tuláakal u lu’umil México.
Le beetike’, tu páayt’antaj kaaj ti’al u jach kaláantikubáaj, ti’al kéen t’a’anak máak, wa kéen túuxta’ak k’uben t’aane’, ma’ u núuka’al, mix xan u péets’k’abta’al mix jump’éel link, ts’o’okole’ wa yaan ba’ax ma’ sáasile’, ka úuchuk t’aan te’e baankóo’ wa ka xi’ik máaki’.
Ichil ba’ax a’alab tumen Rosado Jiméneze’, le ja’ab máaniko’, ichil tuláakal u noj lu’umil Méxicoe’ k’ama’ab óoli’ 140 mil tak poolo’ob, ti’ le je’elo’obo’ 60 mile’ yanchaj ba’al u yil yéetel ookol tu k’aaba’ baankóo.
Uláak’ ba’ale’, u 15 por siientoil tak poolo’ob beeta’ab yóok’lal baakose’ ma’ yóok’lal taak’ini’, tumen yaan ba’al u yil yéetel áadministratiibóo ba’alo’ob tumen ma’ patal bin u beeta’ali’, beyxan tumen ku ts’a’abal táarjeta de kreeditóo kex ma’ k’áata’ani’, wa tumen k’áata’ab ka tse’elek wa ba’axe’ chéen ba’ale’ ma’ ts’aatáanta’abij.
Ichil u ja’abil 2022e’, Unidad de Atención a Usuarios de Yucatán, méekt’anta’an tumen Comisión Nacional para la Protección y Defensa de los Usuarios de Servicios Financieros (CONDUSEF) tu ts’aatáantaj 4 mil 216 tak poolo’ob. Le je’ela’ tu chíikbesaj j-éem 21.2 por siientoil ti’ le beyka’aj yanchaj 2021, tumen te’e ja’abo’ yanchaj 5 mil 347 u p’éel t’aano’ob yóok’lal.
Xak'alutskíinsa'an tumen: Sasil Sánchez Chan
