Tu k’iinil jo’oljeake’, ichil tsikbalo’ob beeta’ab tu cha’anil Filey, yanchaj jump’éel tu’ux tsikblta’ab jejeláas ba’alob yaan ba’al u yil yéetel ts’íibo’ob, beyxan áanalte’ob yéetel meyajo’ob ku beeta’al ich maaya t’aan. Ti’ le súutuko’ táakpaj xka’ansaj Lorena Hau Ucán, Daniela Cano Chan yéetel Sasil Sánchez Chan, ts’o’okole’ nu’ukta’ab tumen Elisa Chavarrea.
En español: Leer en lengua maya necesita alfabetización: Sasil Sánchez en la Filey
Hau Ucane’ tu ya’alaje’ k’a’anan u meyajil xaak’al ts’íib, ba’ale’ le je’elo’, ma’ tu kaxtik u k’exik u tuukul máax ku ts’íib, chéen ku yilik ka na’atpajak ba’ax le ku yóota’al a’albilo’. Tu súutukil u tsikbal Daniela Canoe’ tu ya’alaje’ ti’al u beeta’al áanalte’obe’ k’a’anan u tukulta’al máax ti’al ku beeta’al, bix kun tsolbil le ts’íibo’ yéetel bix kun chíikpajal tu ts’ook, tumen lelo’ yaan ba’al u yil yéetel bix kéen xo’okok tu ts’ook. Beey túuno’, Sasil Sánchez Chane’ tu ya’alaje’ k’a’anan u náachtal u tuukul máak yéetel le meyaja’, tumen ya’ab ba’al k’a’abéet u na’ata’ali’, je’ex u k’a’ananil u ts’íibta’al ba’al chéen ich maaya, wa u nojba’alkúunsa’al u maayaili’; u k’a’ananil u yantal áanalte’ob, ba’ale’ beyxan u ka’ansa’al máax u xokik. Uláak’ ba’al tu tsikbaltaje’, leti’ u na’ata’ale’ ts’íib ich maayae’ ts’o’ok u káajal, ba’ale’ ma’ u k’áat u ya’ale’ chéen jump’éelili’ yaan bix u beeta’ali’.
Le tsikbala’ táakpaj ichil meyajo’ob oksa’ab te’e cha’ana’, yóok’lal Programa Institucional de Estudios del Pueblo y la Cultura Maya, jo’olbesa’an tumen xka’ansaj Cristina Leirana.
Xak'alutskíinsa'an tumen: Sasil Sánchez Chan
