Ichil 27 tak 31 ti’ marzo táan u máana’, ku páayt’anta’al kaaj ti’al u táakpajal ichil u meyajil “Semana por el Agua 2023”, ikil táan u náats’al U K’iintsil Ja’, –le 22 ti’ marzo ku taala’–, tu’ux yaan u tsikbalta’al jejeláas ba’alob yóok’lal le k’a’anan ba’ala’, ti’al u ts’a’abal k’ajóoltbil xan ba’ax je’el u yutstal u beeta’al ti’al u ts’aatáanta’al talamo’ob yaan kéen jo’op’ok u meyajta’al ja’, kéen k’a’abéetkunsa’ak tumen kaaj yéetel ti’ najo’ob, beyxan kéen meyajnak ti’al jóoyab, ichil uláak’ ba’alo’ob.
U nooyil ba’ax kun tsikbaltbile’, leti’e’ ja’ ku k’askúunta’alo’ yéetel u seten k’a’abéetkunasa’al, le beetike’ Colegio de Ingenieros Químicos, Sociedad
Yucateca de Ingeniería Sanitaria y Ambiental, Colegios de Posgraduados en Ciencias Ambientales y Biotecnología del Sureste, Sociedad Latinoamericana de Ciencia y Tecnología EcoHyT yéetel Va por la Tierrae’ táan u beetiko’ob le noj meyaja’ ti’al u yila’al ba’ax je’el u yutstal u beeta’al ti’al u kaláata’al tu beel le ja’o’.
En español: ''Semana por el Agua en Yucatán'' aportará soluciones para cuidar el recurso hídrico
Sandra García Peregrina, máax chíikbesik Reserva Cuxtal, tu ya’alaje’ meyaj ku beeta’al ti’al u kaláanta’al ja’e’ unaj u taal ti’ u jejeláasil jaats kaajo’ob, tumen jump’éel ba’al yaan ba’al u yil yéetel tuláakal máak.
“K’a’abéet u bin u jach ma’alobkúunsa’al le poliitikáas publikáas jets’a’an ti’al u kaláanta’al ja’, tumen u Petenil Yucatáne’, jump’éel ba’al jach séeba’an u yúuchul wa ba’ax yéeteli’”.
Tu ya’alaje’, yaan uláak’ lu’umo’ob tu’ux jach sáasil yanik táan u k’astal ja’ ka’alikil ti’ le petenila’ ma’ beyi’, chéen ba’axe’ yaan ya’abach ba’al táan u k’askúuntik yéetel u seen ch’a’abale’ jach láayli’ chíika’an “k’a’abéet kna’atike’ táan u chíikpajal u chak sáasil sajbe’entsil ti’ le kaaja’, le lu’uma’ yéetel le yóok’ol kaaba’”. K’a’abéet u kaxta’al ba’ax kun beetbil ti’al ma’ u yúuchul ba’al beya’, tu ya’alaj.
Ku páajtal u xak’alta’al le jejeláas meyajo’ob kun beetbil ti’ le kúuchila’: vaporlatierra.com/2023/8903/semanaporelagua.
Xak'alutskíinsa'an tumen: Sasil Sánchez Chan
