Ch’íich’ k’aaba’inta’an Charrán de Sandwiche’ juntúul ba’alche’ suuk u yila’al tu jáal ja’ilo’ob Ciudad del Carmen, chowak u koj yéetel séeba’an u péek’, ba’ale’ sajbe’entsil yanik u ch’éejel yóok’lal wíinik ku seten máan tu’ux ku ye’el.
Thalasseus sandvicensism, u sietntiifikoil k’aaba’. Tu yóok’kabil u wíinkilale’ óol samal boox u boonil yéetel kaabale’, sak. U p’o’ote’, boox yéetel ku boox t’o’olchajal ti’al u k’iinilo’ob ke’elil, yéetel u koje’ ku k’aank’antal tu puuntail.
En español: Charrán de Sandwich, amenazado por los bañistas en Carmen
Jacqueline May Díaz, máax beetik u k’a’aytajil u múuch’kabil Desarrollo y Medio Ambiente, A.C., tu tsolaj le ch’íich’a’, ku luk’ul ti’ u jáail ja’ilo’ob yaan tu xamanil Florida ti’al u k’uchulo’ob tak Golfo de México, tu jáal ja’ilo’ob Ciudad del Carmen, tu’ux ku máansik jun jaats k’iino’ob.
Tu tsolaje’, juntúul charráne’ je’el u p’isik ichil 37 yéetel 43 cms u chowakil; kéen u xit u xiik’e’, je’el u náakal tak ichil 85 yéetel 97 cms.
Xbiologáa Yanec Jiménez Ruiz tu ya’alaje’ ku yantal u mejenil le ch’íich’o’oba’ichil u yáax óoxp’éel wa kamp’éel ja’abil u kuxtal.
Xak'alutskíinsa'an tumen: Sasil Sánchez Chan
