Yéetel u féederal nu’ukbesajil Sembrando Vida, u kolnáalilo’ob u noojol-lak’inil Méxicoe’ yaan u béeytal u konik u pak’al k’uxub ti’ mola’ayob je’el bix La Anita, tu tsolaj súubsekreetario Paulín Hernández.
U tuukulil nu’ukbesaj ku beetta’ale’, leti’ u béeytal u yantal utsil paak’áalo’ob ti’al beyo’, kéen úuchuk jooche’, u béeytal u ko’onol ba’ax ku ko’olol ti’ nojoch mola’ayo’ob, ti’al beyo’ u k’uchul tak tu k’ab máax ku maan.
Le je’ela’, jump’éel ba’ax tsikbalta’ab ti’ jump’éel múuch’tambal meyaj beeta’ab, tu’ux táakpaj u súubsekretarioil Nacional de Inclusión Productiva y Desarrollo Rural ti’ u mola’ayil Secretaría del Bienestar, Raúl Paulín Hernández; u déelegadoil Gobierno Federal ti’ u lu’umil Yucatán, Joaquín Díaz Mena, yéetel máaxo’ob jo’olbesik u mola’ayil La Anita Condimentos y Salsas S.A. de C.V., Francisco Ávila Heredia beyxan Ali Charruf Álvarez.
Lee: Sembrando Vida venderá cosecha de achiote a empresa yucateca La Anita
Te’e súutuko’ a’alabe’, yéetel le 26 miyoonesil kúulul k’uxub pak’a’an ti’ u kamp’éel jatsk’áabo’ob Kaanpech, Chiapas, Yucatán yéetel Quintana Rooe’, ku tukulta’al te’e ja’aba’ yaan u jocha’al kex 90 tóoneladasil k’uxub.
Joaquín Díaz Mena tu ya’alaje’, yéetel nu’ukbesaje’ ku kaxta’al ka meyajta’ak le koolo’, tumen ku bo’otal kolnáalo’ob u ti’al; ku ts’a’abal ti’ob 6 mil pesos lalaj winal ti’al u kaláanta’al 2.5 u eektaareasil k’áax. Beyo’, ku kaxta’al u p’áatal máak tu káajal, ti’al ma’ u yantal u bin u kaxt meyaj táanxel tu’ux.
Te’e súutuko’, táakpaj máaxo’ob jo’olbesik meyaj ti’ u jaats k’áaxilo’ob Sembrando Vida tu péetlu’umil Kaanpech, Marcelo Contreras Roldán; Chiapas, Julio Jesus Montiel; Tabasco, Reynol Chamec; yéetel Yucatán beyxan Quintana Rooe’ Adrian Flores Heredia.
Xak'alutskíinsa'an tumen: Sasil Sánchez Chan
