Tu chúumukil u asab nojoch saamil yaan yóok’ol kaab, arkeologose’ tu kaxto’ob nu’ukulo’ob yaan kex 1.3 miyoonesil ja’abo’ob, ti’alinta’ab tumen yáax wíiniko’ob kúuch’o’ob ti’ yaanal lu’um ma’ Áfricai’.
U múuch’il máak ku meyaj Instituto de Arqueología ti’ u mola’ayil CAS, yaan tu lu’umil Pragae’, táan u meyaj tu saamil lu’um Rub' al Khali, tu méek’tan kaajil Dhofar, Omán, jayp’éel páano’ob yéetel xaak’alo’ob ti’al u k’as na’atiko’ob bix úuchik u máan ba’al te’elo’.
Ichil u jach k’a’ananil nu’ukulo’ob kaxta’abe’, ti’ yaan le báato’ob meyajta’an yéetel tuunich, ajxaak’alo’obe’ tu kaxto’ob xan uláak’ nu’ukulo’ob póola’an yaan kex 2 mil ja’abo’ob u yúuchbenil, je’el bix trilitos.
En español: Descubren hachas de piedra de hace 1.3 millones de años en Omán: Fotos
Arkeeologo’obe’ tu ya’alajo’ob le móonujmetos kaxta’abe’ óoli’ u mejenil Stonehenge, yaan Inglaterra, ba’ale’ tak walkila’ ma’ ojéel’aan ba’ax ti’ k’a’abéetkunsa’ab wa máax beetej.
Beyxan tu ya’alo’obe’ tu kaxto’ob jump’éel neoliitikáa muukil; ichile’ kaxta’ab ka’ap’éel kaamaráas tu’ux muka’ab jaytúul máako’obi’. Le je’ela’ yaan ichil 5 mil tak 4 mil 600 ja’abo’ob ma’ili’ okok u jaats k’iinilo’ob k’ajóolta’an beey Nuestra Era, ts’o’okole’ chéen yéetel u xaak’alil baak yéetel koj bíin béeyak u yojéelta’al uláak’ ba’alo’ob yóok’lal le reestoso’obo’.
Xak'alutskíinsa'an tumen: Sasil Sánchez Chan
