U najilo’ob xook Normales yaan tu petenil Yucatáne’ tu beetajo’ob jump’éel mokt’aan ti’al u péektsilta’al yéetel u beeta’al meyajo’ob tu’ux ka táakmuk’ta’ak u jejeláasil miatsilo’ob yaan te’e baantao’, ka’alikil táan u kaambal máaxo’ob ts’íibta’an u k’aaba’ob te’elo’, ts’o’okole’ yaan xan u mu’uk’ankúunsa’al yéetel u kaxta’al ka ka’ansa’ak yéetel ka ka’anak le maaya t’aano’.
Mokt’aane’ jóok’ úuchik u beeta’al Encuentro Peninsular de Escuelas Normales, jbeeta’ab tu noj kaajil Jo’, le 22 ti’ mayo máaniko’, tu’ux táakpaj máaxo’ob jo’olbesik najilo’ob xook yéetel ajka’anasjo’ob ti’ 20 u p’éel najilo’ob xook Normales tu péetlu’umil Yucatán, Kaanpech yéetel Quintana Roo.
En español: Normalistas de la península de Yucatán acuerdan promover la riqueza cultural de la región
Te’e súutuko’, táakpaj máax jo’olbesik Educación Superior para el Magisterio (DGESUM), Mario A. Chávez Campos, máax tu ya’alaj mokt’aane’ beeta’ab ti’al u chíikpajal bix kun je’ets’el le xooko’, tumen ti’al u béeytale’ k’a’abéet u yantal múul meyaj ichil le najilo’ob xooko’, ichil le jejeláas ba’al ku ka’ansalo’ yéetel ichil u jejeláasil ja’abo’ob xook ti’al ke jéets’ek u lu’umil tu’ux kun úuchul meyaj.
Beey túuno’, ajka’ansajo’obe’ tu chíimpoltajo’ob u k’a’ananil u yantal u yóol máak ti’al le meyajo’, yéetel ti’al u múul beeta’al, tumen beyo’, yaan u béeytal u beeta’al nu’ukbesajo’ob ka táakbesa’ak te’e kaambal ku ts’a’abalo’, le beetike’, ba’ax kun meyajtbile’ yaan u méek’tantik tuláakal le petenilo’.
Ichil mokt’aano’ob jets’a’abe’ ti’ yaan: u péektsilta’al u jejeláasil miatsilo’ob yaan te’e Petenilo’ ka’alikil táan u yáalkab u ja’abilo’ob xook; u patjo’olta’al kaambal xook wa ka’ansajo’ob, ichil u ja’abil xook wa jumpáay ti’, ti’al u táakmuk’ta’al ka yanak jump’éelili’ bix u yúuchul ka’ansaj te’e petenilo’.
Uláak’ ba’ale’, u beeta’al u nu’ukulil k’a’abéet ti’al u yúuchul le kaambalo’, beyxan le ka’ansajo’, je’el bix k’a’abéeto’; u mu’uk’ankúunsa’al yéetel u táakmuk’ta’al u ka’ansa’al yéetel u ka’anal maayat’aan beyxan ka úuchuk kaambal yéetel ka’ansaj ich maaya t’aan, ichil uláak’ ba’alo’ob.
Ikil beeta’ab le múuch’tambalo’, táakpaj xan, ba’ale’ ti’ Internet, uláak’ u ajmeyajilo’ob kaambal ti’ u noj najilo’ob xook Universidad de Belice Corozal Junior College yéetel u Normalesil Guatemala, ti’al ka táakpajak uláak’ máako’ob ku ka’ansajo’ob.
Xak'alutskíinsa'an tumen: Sasil Sánchez Chan
