A wóojel wáaj. Tu noj kaajil Ciudad de México yaan jump’éel u jejeláasil xchiwol suuka’an u yantal tu baantail tu’ux yaan Pedregal. U k’aaba’e’ Aphonopelma anitahoffmannae, yéetel ti’ ku yantal u ya’abil, tu noojolil le noj kaajo’.
Maas jach k’ajóolta’an beey u xchiwolil Pedregal. Ka’aj yáax yanchaje’, de por si te’e noj kaaj síijo’, ts’o’okole’, kex yéetel beyka’aj jela’an u yila’ale’, ma’ tu beetik mix jump’íit k’aas ti’ máaki’.
Le xchiwola’, nojoch tu beel yéetel u boonile’ boox yéetel chak, ts’o’okole’ u yooke’ piimtak yéetel yaan u tso’otso’ob. Amo’ob je’el bix le je’ela’, suuka’an u kajtal tu yáam tuunicho’ob wa tikin le’ob, ts’o’okole’ chéen ku jóok’olo’ob ti’al u kaxtik ba’al u jaanto’ob wa ka’alikil k’ucha’an u k’iinil u kaxtik u núup.
En español: Conoce a la Tarántula del Pedregal, la especie endémica de la CDMX
U Xchiwolil Pedregale’ k’a’anan tumen ku yáantaj u ts’áaj u p’iis u yantal uláak’ u jejeláasil ik’elo’ob, tumen ichil ba’ax jach suuk u jaantike’, ti’ yaan xna’ats’ulo’ob, yéetel míin ku béeytal tak u janatik uláak’ mejen ba’alche’ob je’el bix ch’o’ob.
Ichil jayp’éel ba’alo’ob a’alan tumen @Arachno_Cosas, jtwiteróo jach kambanaja’an yóok’lal amo’obe’ tu ya’alaje’ le chan ba’alche’a’ ma’ sajbe’entsil ti’al wíiniki’, tumen kex ka chi’ibik tumene’, ma’ táan u beeta’al loob ti’.
Suuka’an u yila’al le ama’, tu kúuchil Reserva Ecológica del Pedregal, tu baantail San Ángel, tu bak’pachil Ciudad Universitaria.
Xak'alutskíinsa'an tumen: Sasil Sánchez Chan
